Kan vawleipi cu coronavirus hmang in thihnak thlanmual ah ai cang ko cang. A tu tiang ah hi zawtnak in a zawmi hi minung million khat an phan cang. Cu lawng silo in minung 50,000 nih an thihpi cang. United States hi coronavirus a tam biknak hmun le a thimi an tam biknak ram a si tiah an thanh.

Vawleicung ramkip nih hi zawtnak a karhlonak ding caah ti in lockdown an tuah ko nain zawtnak a karhning hi khuaruahhar taktak in a rang tthiamtthiam ko. United States, Spain le Britain hna hi a zualhmatnak ram hna an si lio a si. Kan vawleipi cu mithli le chunmui nih a zual in a zual cuahmah ko cang.

Cu caah chawlehthalnak lei zong ah nikhat hnu nikhat in a zor chin lengmang. American ah cun minung 6.65 million nih kan rian ttuannak in hlawknak zei hmanh kan hmu ti lo an ti cang. Kan hnu lei zarhhnih March thla ah khan minung 10 million nih an rian an chuahtaak phah cang. Mithiam pawl nih an tuakning ah cun vawleicung chawlehthalnak hi chiat lei a panh chin lengmang ko rih lai tiah an chim.

The Asian Development Bank nih nizan cacawn ningani ah ralrin peeknak bia an chimmi cu hi zawtnak virus ruang ah hin vawleicung chawlehthalnak phaisa USD $4.1 trillion cu a dih diam lai ti a si. Vawleicung hruaitu pawl hna nih cacawn nilini ah khan hi harnak dohnak ding caah hin World Bank nih emergency in USD $ 160 billion cu thla 15 chung ah cash bak in chuahding in hnatlaknak ngeih a si. Ref: Mizz