Coronavirus Buainak Lak Ah Ralzaam Minung 202 Hna Cu Malysia Ah Tlaih An Si. Vawlei mi vialte coronavirus ruang ah lungrethei le awlokchong in um lio ah ralzaam minung 202 hna cu Malaysia ah tlaih an si. Cozah nawlngeitu nih an chimning ah cun nizan Pathianni ah khan Malaysia ah phung ninglo in Rohingya Muslim pawl cu tilawng in an rak phan. Coronavirus kong ah thinphang in um lio ah misual pawl kong zong ah lungrethei in um tthiamtthiam a si tiah an chim.

Malaysian Maritime Enforcement Agency deputy director Zulinda Ramly nih nga tlaihnak tilawng nganpi khat in Rohingya mipeem pawl cu Langkawi tikulh chakleikam in an lut tiah AFP sin ah a chim. Malaysia hi Myanmar ram in Muslim mi tampi hna nih phanh an duh biknak hmun a si. Ref: Mizz

Thazaang rak la ve: JOB 1:21. Taklawng In Ka Kir Than Lai:“ Ka nu paw chungin taklawng in ka chuak i taklawng in ka kir ṭhan lai; Bawipa nih a ka pek i Bawipa nih a lak ṭhan; Bawipa min cu thangṭhat si ko seh,” tiah a ti.

Job cu angeihchiah le a chawva,asatil run hna le sin um, fanu ,fapa vialte ni khat bakah an thih loh tak dih i anun ngeihchiatnak le tahaihramnak aciah asinain a Pathian ahcun ai lawm thiamthiam. Pathian a thangthat khawh thiamthiam. Zeicaah dah Pathian a thangthat khawh tiah cun amah ta, taktak an si lo zia kha ai fiang i Pathian nih hlanh chung mi lawngte an si kha a theih caah a si. Cun vawlei ah taklawng bakin a rak chuak i tak lawng bakin a kir than ding mi asi kha fiangtukin a theih caah asi.

Vawlei kan nun chungah kan fimnak dihlak , kan thazaang dihlak , kan caan dihlak hmangin chawva kan kawl inn lo tha kan rian hna sertu Pathian hmanh thei lo le i bochan kho loin caan tampi kan cawlcaang. Kan ngeih cia mi ah a za cang ti khi zeitik ah dek minung nih hin kan va ti khawh te hnga?

Zeizat tam hmanh khi va ngei usih law kan nunnak adih ni ahcun zeihmanh kan i kal pi khawh ding mi a um lo. Kan kaltak ding mi thil kongah biatak kan chuah bantukin sertu Pathian lei ah biatak chuah in caan tawi te vawlei kan nun chungah kan pumsa in siseh kan chawva in siseh Pathian sunparnak alangh tertu si kho dingin i zuam cio hna usih.

Taklawng tein kan kir than cio ko hna lai cuaah ahohmanh hngar ding an si lo. Inn tha lo tha rumnak zong hngar ding an si lo. Pathian atihzah mi le Pathian caah ai pumpe mi hna nun tu khi kan hngar hna ding asi. Taklawng in ka kir than lai.

Peng Uk Thang
Tokyo Chin Church