Congratulions: Tlangvaal Lal Nun HLu nih 5 D An Kan Hmuh Piak E A Sunglawi Taktak

Chin News

2019-2020 Academic Year, tanghra result zohtikah Laitlang/ Chin State cu 20.20% tluk lawng a si. Kawlram pumpi ah a chiabik kan si. Asinain kan fa kan naule tete result a chia lo a ṭha ngaingai. A tlangpi in 4 D le 5D deuh ngawt an si hna. A cheu cu 6 D a hmu mi zong an um pah hna.

Image may contain: 1 person, standing and indoor

Tutan zongah lawmh a um tukmi cu Tahan ah a ummi Pu Lal Rawng Bawl le Pi Lal Zi Ding hna i an fapa Salai Lal Nun Hlu nih YCW Private High School in 5 D in a kan awn piak. 5 D a hmuhmi subject hna cu, Myanmar,English, Maths, Chemistry le Bio in tanghra a kan awn piak. Lawmhnak a sang khun.

Tanghra sungh awn kong he thawngpang dang rak rel chih; Hakha in 4d a kan hmuhpiaktu Siang Cung Lian aa timhtuah ning le aa timhmi. August 9 zinglei ah Kawlram pumpi taang-10 sungh-awn result an chuah i Hakha in minung pathum in 4D a kan hmuhpiak.

Cu hna pathum lak ah cun Siang Cung Lian zong aa tel. Siang Cung Lian (kum 17) hi Thantlang khuasa saya Pu Naing Aung le Pi Tial Tin Fam hna i an fapa a si. Siang Cung Lian hi Chin ramkulh aiawh in Kawlram pumpi siangngakchia ca zuamnak ah aa tel tawnmi zong a rak si.

Taang-10 caminpuai ah Master Cung Chin Sang nih Kawlca, Mirangca, Chemistry le Bio tiin 4D a hmu. Siang Cung Lian hi 6D a hmuh lo hmanh ah 5D tal hmu kho ding in faak piin a rak i zuammi a si nain a thiam bikmi Math Subject ah Distinction hmu loin a um.

“6D a si lo hmanh ah 5D hmu kho ding in ka rak i timh nain ka thiam bikmi Math Subject ah Distinction a chuah lo tik ah ka ngaih a chia pah i, ka khuaruah zong a har. Ka phit khawh bikmi zong a si fawn. Asinain, 4D ka hmuhmi cung ah kaa lawm ko,” tiah a chim.

4D hmu kho ding in a rak i zuamnak kong he pehtlai in Siang Cung Lian nih, “Pakhatnak ah cun lung nuamh lonak um lo ding tein kaa zuam hmasa. Ca ka zoh lai poah ah thla ka cam ta. Cun, pakhatkhat lungretheinak ka ton caan ah Baibal ka rel tawn. Ca ka zoh cang lai ka ti cun a dang kong zei hmanh ka ruat ti lo. Ka aw a ttha lo nain hlasak hi ka zuam ngai. Asinain, sianginn ka kai chung hi cu hla zong sa loin ca lawng hi biapi ah ka chiah. Cun, ka nulepa le Khrihfabu thlacampiaknak thawng in atu bantuk in ka ngahmi hi a si,” tiah a chim

Tukum taang-10 a kai dingmi kan nau le sin ah Siang Cung Lian nih hitihin bia a cah: “Tu kum cu စနစ်ဟောင်း (Sahnit-Haung) a donghnak bik a si lai ca ah acheu nih afawi lai an ti, acheu nih amah ning si ko lai an ti. Zei a si poah ah khan a fawi ko lai tiin hnangam tein um loin kanmah si khawh tawk in i zuam in kan Lairam dawhter nakding ah i zuam hna sehlaw ka duh. Taang-10 sang piin ka awn ahcun kan miphun ca ah, kan chungkhar ca ah le kan Kawlrampi caah a ttha lai ti kha ruat hna sehlaw nulepa dawtnak ruat buin i zuam kho hna seh ti ka duh. Cun, taang-10 cu abiapit tuk caah ca an cawn lio ah cun ca bak biapi ah chia hna seh ti ka duh,” tiah a chim.

Siang Cung Lian hi amah pumpak le a nulepa zong nih Sii lei thiamnak cawng kho ding in an saduhthahpiakmi a si i, Sibawi fimthiamnak sangpi tiang cawng kho ding in timhtuahnak a ngeimi zong a si.

Hakha in 4D a hmumi a dang pahnih hna cu Master Cung Chin Sang le Nu Tha Hlei Tial an si. Atutan ah Chin ramkulh in 12,370 nih taang-10 caminpuai an phi i, minung 2,623 nih awnnak an hmu. Tedim ah a phimi minung pahnih nih 5D an hmu i, anmah lawng hi Chin ramkulh ah a phimi chung in 5D a hmumi an si. Credit: The Chin Journal

Leave a Reply