Combodia Ram Thil Can Ning Cu Khuaruahhar Taktak Si Ko. Tih anung chin lengmang ko cang, Coronavirus zawtnak cu biatak tein an buaipi ruangmang cang. Hi zawtnak in minung 3971 an nunnak aliam cang i, zawtnak angeimi hi minung tingkhat le thong 12 renglo an phan cang. Italy ram cu atuhi an thinphan ngaingai cang. Prime Minister Giuseppe Conte nih nizan in mipi tampi umnak hmun zong a khap dih.

Mipi vialte hna cu ralring tein um uh tiah ati rih hna. Cun Sport vialte zong tuah rih lo dingin an khap rih. Italy ah minung 430 nunnak aliam cang i, nizan lawngah minung 100 an nunnak aliam. Zawtnak angeimi hi 7375 in 9172 ah an karh colh cang. Cu lawng si loin US zongah minng 400 renglo zawtnak an ngei cang i minung 26 an nunnak aliam ve cang ti si.

Khuaruahhar asimi pakhat cu khuasik caan a um lonak Cambodia ah Japan mi pakhat NGO rian attuanmi cu Siem Reap khuapi Angkor Wat Temple ah a tlawng. Amah hi Vietnam in Japan ah akalmi asi. Amah zong cu tulio zawtnak coronavirus angei tiah an chim. Cu pin amah arak phurtu Tuktuk Driver zong zawtnak angei tiah an chim. Italy ah Cruise Ship nganbik an sermi Costa Furtuna timi minung thonghnih aphurtu ah Coronavirus zawtnak aum sual lai ti phan ah siseh Italy minung tampi a cuangmi an um caah Thailand le Malaysia nih mah Tilong pi cu kan ram chungah nan i din kho lo tiah an ti hna. Hi Tilong dinhnak hi Singapore tu nih cun a sianh man hna lai ti asi.

Hi konghe pehtlaiin aliamcia thla ah khan vawlei cung ram 6 hna nih The Westerdam Cruise Ship zong an ram chungah dinhnak nawl an pe hna lo. Cuticun caansau Tilak ah an um caah Cambodia nih a ram chung ah dinhnak nawl a pek hna i, khuatlawng minung 3500 hna cu Humanitarian Ground ruangah Red Carpet he PM Hun Sen nih a rak don hna ti asi. Coronavirus zawtnak cu atuhi vawleicung ram 100 hrawnghrang ah a karh ngaingai cang. Hi zawtnak hi phungning tein vawlei cung thiamsang hna zong an serchuah khawhmi adamnak sii an hmu rih lo. Cucaah khoi ka kal umnak paoh ralring te le fimkhur tein um cio ding asi.