Colombia ram riithai-sii a chuahtu hna le a zuartu phu nih anmah tein COVID-19 zawtnak hrik i runvennak khuate ca ah zulhphung an sermi a zul lomi paoh an thah hna tiah Human Right Watch(HRW) nih July thla 17 ah Report ah a ṭial.

Colombia rili kam ummi khuate hna cu ngatlaih an thlauh hna, khua hau-ka zanlei suimilam 5 in an kharter hna caah lamkam thil zuartu hna harnak an tong. Cucaah pawcawmnak ca ah rian a ṭuanmi hna cu kan phung a zul lomi an si tiah Minung 8 an thah cang hna tiah theih a si. An thahmi hna minung cu an pawcawmnak ca ah rian an ṭuan i rithai-sii tuahtu hna nih phung nan lonh tiah an thah hna hi a si.

Rian an ṭuan lo ahcun, ei awk an ngei lo ca ah atu bantuk in rian an ṭuan hi a si. Colombia riithai-sii a chuahtu le a zuartu hna nih an ram siifak hna umnak khuate cu an ukkhawhmi an si ca ah atu bantuk in Cozah nih an sermi nakin Rithai-sii a tuahtu hna nih an sermi phung zulh a har deuh pin ah a zul duh lomi cu Cozah theih loin an thah hna hi a si tiah HRW nih a ṭial.