Ralrin Peknak: NLD Party (Hakha) nih CNLD Party kong a dik lo ning in bia vahter le ramkhel in thurhnom mipi hlennak bia nan vahter len mi kan theih. Abik in Pu No Than Kap nih a tuah lo mi ca cu CNLD Party tlanglamhnak in Social Media Kip ah an thanh mi kan hmuh (atang hmantlak ah CNLD Falam nih fianternak an tuah mi kan langhter chih).

Cu lawng si lo in Upadi Choh (Attorney General) a si mi Pu Sonny Thang cung nih keimah Vuanci ka tlin lo ahcun Falam pa, Tedim pa le Thantlang pa nih Vuanci an tuan lai i Hakha caah zeihmanh an kan tuahpiak lai lo tiah Peng khat le Peng khat karlak thleidan in mipi sin ah thimfung lemsoinak a tuah mi kan hmuh (Voice Record thate in kan ngei).

Atu bantuk in thil dik lo le peng khat le peng khat kar huatnak karh in biachim hi upadi he aa ralkah mi a si caah atu hnu in tuah ti lo ding ah le, nan tuah rih a si ahcun thimnak upadi ning in tuanvo kan in lak hna lai tiah thawng kan in theihter hna. Source: Chin National League for Democracy – Hakha-Thantlang

Thawngpang dang rak rel chih: Miphun Covo Laak Than Ding Ah: CNLD nih “Miphun Covo kan lak than lai” kan timi cu zeidah a si. 1947 February 12 ah Chin, Shan, Kachin le Kawl (Bamar) nih Panglong biahrennak minthutnak in ramkomh Kawlram cu kan dirh. Ramkomh Kawlram ah i fonh ding in hnatlak minsen kan thut mi (10) chung ah no. 5 ah aa tialmi cu mah le miphun cio nih mahte in ukding ti kha a si (Kawl fang khat, Chin fangkhat).

Miphun tlukruannak a um lai ti a si. Mah te in uknak nawl ruang ah ramkomh Kawlram ah Kachin le Shan he kan i fonh hi a si. Pu Kio Mang zong nih, “kanmah te in uknak nawl le khuakhan lairelnak kan ngeih ahcun ramkomh Kawlram ah kan i fonh ko lai tiah a ti. A sullam cu Kawl cu Kawl nih, Chin cu Chin nih, Shan nih Shan, Kachin nih Kachin mahte in i uk cio ding timi hnatlakank kha a si.

Cu lawng a si lo ramkomh Kawlram ah nan i nuam lo, um nan huam ti lo ahcun kum (10) hnu ah ramkomh in chuahnak nawl zong hnatlaknak a um i 1947 Kawlram phunghrampi zong ah “chuahnak nawl” cu telh a si.

Hi Panglong biaremnak le kan biakamnak a tlamtlin lo caah kum 70 renglo ramchung raldohnak a chuak. Kan ram a rawk in U Nu chan ah Asia ram ah ramthawng bik, ram rum bik sinak in siifak bik ah kan i chuah. Ahrampi cu ral ruang ah. Ral a chuahnak hrampi cu miphun dang nih tlangcung mi covo an buar caah le Panglong biahren a tlam a tlin lo caah a si. Cucaah CNLD nih Panglong hnatlaknak ning in kan “Covo Kan Khirh Than U” tiah miphun caah kan dir hi a si.

Ramleng ummi Chin miphun zalongte in kan ram nan kir khawhnak caah Nay Pyi Taw pa va hal lo in kanmah te in khuakhan khawh kan duh. Ramleng ummi nih kan ram ah University an sak khawhnak, Airport sak khawhnak, fim nan kan chimh khawhnak caah Nay Pyi Taw pa hal hau lo in kanmah te in tuahnak nawl kan duh.

Nay Pyi Taw pa nih ramchung thil chuak, ngunkhuai in hmuh mi tangka, Japan, Australia, World Bank tbk,tangka a cawimi phawt chom in kan ram thanchonak tuah si lo in, Chin mi nih kanmah te in nawl ngeih in thancho tuahnak nawl, lairelnak nawl kan mah kut ah um seh, nawlngeinak le tawlrelnak nawl kan covo kha kan duh.

Kan miphun kong ah midang Bochan lo in kanmah te in ser ve kan duh. Pathian nih miphun tling ah a kan ser. Cawisan ding ah tuanvo kan ngei. Cucaah aralaimi November 8 ah Kawl nih Kawl Party thim seh, Chin nih Chin Party thim ve seh. Shan nih Shan, Karen nih Karen, Kachin nih Kachin tiin mah le miphun Party cio i thim hna usih.

Cuti kan i thim lawng ah Chin nih Chin aiawh in kan ram sersiam thannak caah Parliament ah miphun dang he bia kan i ruahti lai, remdaihnak lamthluan ah bia kan i ruahti hna lai. Kanmah le miphun covo cio i upat in ramkomh cu kan ser than lai.

Panglong hnatlak bantuk in Chin nih Chin uk khawhnak caah Chin Party thim hram hna usih. Cu lawng ah Kawl he Shan he Kachin mah kanmah le kan duhmi cio bia kan i ruahti hna lai i, ramkomh Kawlram cu kan ser khawh lai. Panglong hnatlaknak tlamtlinter ding ah Kawl nih tuanvo a ngei i Chin nih kan ngei ve. Shan nih Kachin nih a ngei ve. Cu a tlamtlin nakhnga Mah le Miphun dirkamh cio hram hna usih! Editor-Chin Miphun Authawng

Admin hmurka: Chinworldnewsvening nih thawngpang kan ṭialmi hi kanmah nih kan phuah cawpmi kan ṭialmi a si lo. Mipi sinah adikmi thawngpang zamh hi kan i hmuitinhmi a si. Cun, thawngpang kan ṭialmi hi areltu mipi caah ṭhathnem santlaih, theihtleih ṭha siseh ti hi kan i hmuitin bikmi a si. Asinain, minung kan ti cu tlamtlinlonak tete zong a kho mi a si caah thawngpang kan ṭialmi kan palhnak a um  cun theihter khawh peng kan si.

Mipi sinah thawngpang thlazamh piak na duh si cun zeitik caan paoh kan i thlahzamh piak khawh zungzal hna. Kan thawngpang ṭialmi kongah, pehtlaih a duhmi nih Salai J Vanduhthar Lahnin ah pehtlaih khawh peng kan si. Na relmi thawngpang hna hi midang nih an rel khawh ve nak hnga aṭha tiah na ruahmi a um ahcun share in rak kan bawm ve. Kan ca a kan rel piaktu nan dihlak cungah kan ilawm. Upatnak he Admin