CNLD Party Cu President An Sinak Ding Lam A Um Lo Caah Chin Cozah Ser Khawhnak ‘Tawh’ An Ngei Rih Lo

Hmuhning

In-depth analysis: CNLD party caah Chin cozah ser khawhnak lam a um taktak maw?

Image may contain: 1 person, standing and indoor

1. Chinram cozah ser ding ah MP 13 tal a hau. Ralkap 6, CNLD an thawn lonak Tedim 2 le Tonzang 2 zuh ahcun i cuh ding 14 lawng a tang. Zeiti lam hmanh in CNLD nih 14 chung ah 13 an hmuh khawhnak ding lam a um rih lo.

2. Majority lampi ai khar hlei ah 2008 Constitution ning in chief minister cu president nih a thim ding a si. Phundang chim ahcun CNLD party cu president an sinak ding lam a um lo caah Chin cozah ser khawhnak ‘tawh’ an ngei rih lo, pohmah 261 nih tawh a hrenh.

3. 𝐅𝐨𝐧𝐡 𝐜𝐨𝐳𝐚𝐡(𝐜𝐨𝐚𝐥𝐢𝐭𝐢𝐨𝐧): Pu Ngaisak nih ‘NLD hi anmah tein rampi cozah an ser khawh lai lo caah tlangmi party an kan sawm te lai, cutikah chief minister or vuanci hmunhma kan hal ve lai’ tiah a chim.

A chimmi a dikmi a lo ko. Nain, a taktak ah a si kho lomi khi a si. Aruang cu, langmi party 40 leng an um. An thazaang, an i tinhmi le an duhmi ai dang cio. An policy ai khat dih lo caah tlangmi party vialte khi party pakhat bantuk an tanti khawhnak ding lam a um lo, a taktak ah a si kho lomi a si.

𝐓𝐥𝐚𝐧𝐠𝐦𝐢 𝐩𝐚𝐫𝐭𝐲 𝐟𝐨𝐧𝐡 𝐔𝐍𝐀 vs 𝐍𝐁𝐅: Tlangmi party tampi fonh in sermi coalition pahnih(UNA le NBF) an um. UNA hi Shan party ngan bikmi SNLD, Zomi party etc. an i telnak a si. NLD he hawikom an si. NBF cu Shan party SNDP, Pu Zozam le Pu Nothankap an i telnak a si–2010 election ah thimnak a lutmi phu an si.

Phundang chim ahcun NBF phu cu NLD nakin USDP le ralkap he ai hawikom deuhmi an si. NBF le UNA ah a lut lomi party tampi an um fawn, an duhmi le an tinhmi ai khat cio lo caah an luh lo hi a si.

NLD nih cozah sernak a herhmi MP 333 hi ngah kho sual hlah sehlaw tlangmi party dihlak a sawm hna lai lo. MP tampi zong an herh te lai lo. A sawm ding party cu a hawikom SNLD le Zomi party bantuk khi an si te lai. Suu Kyi le Aung San doh le soisel, Kawlmi huatnak karhter in MP tlin ai timmi party pawl cu NLD nih a sawm hna nak ding lam a tlawm ngai.

NLD hi tutan thimnak ah cozah power an ngei chap cang caah 2015 nakin an thawng deuh lai tiah tampi nih an zumh. Kawlmi regions, Kayin, Kayah, Chin, Mon le Kachin lakah USDP power a zor cang caah NLD an thawng deuh lai tiah zumh a si. MP 333 cu fawi tein an ngah ko lai tiah tampi nih an zum.

NLD nih tlangmi party a sawm sual hna zong ah Pyine Hluttaw i majority a ngeimi party lawnglawng cozah sernak nawl a pek hna hnga. Party poah chief minister pek ahcun Shan ah cun chief minister 5 hrawng an um a hau hnga. Majority a ngei lomi party cu ‘chief minister’ pek phung hrim a si lo, hal phung zong a si lo. Cucaah, Chin state Hluttaw ah MP majority hmanh a ngah kho lo ding CNLD party nih ‘cozah sernak nawl le chief minister kan hal lai’ an ti ngam khi mipi hlen phunkhat a si.

CNLD hi miphun min in a dirmi party an si caah 2015 bantuk an dihlak sungh than cu zoh ai dawh lai lo, a fit deuhmi Pu Ngaisak le Van Bawi Lian hna khi cu vote pek ding an si ko. Nain, ‘cozah kan ser lai, chief minister kan tuan lai’ tibantuk hlennak bia cu an hruaitu hna hmurka in a chuak awk si lo tiah ka ruah. Caṭialtu: Salai Lungthli Tum

Leave a Reply