Lungsamat Media he biaruahnak ah CNLD an chairman Pu No Than Kap nih Falam Laizo holh cu Chinram official holh (zung hmanmi holh) ah ser ding le Chinram sianginn vialte ah cawnter ding ah President Thein Sein cozah sin a rak halnak kong a phuan.

Chinram official holh caah Laizo holh siseh tiah a duhnak aruang zong a tanglei bantuk in a chim chih. Maymyo ummi Mirang cozah Education Department nih 1992 kum ah Laizo holh le ca hi Chinram sianginn vialte ah cawn dih siseh tiah biachahnak ‘resolution’ an rak tuah cangmi a si. 1958 August ah tlangcung miphun holh in nan chim lai(zeidah timi a chim chih lo) an ti tikah Chin miphun aiawh in Laizo holh kha U Nu cozah chan ah rak hman a si fawn.

Cun, Chinram ah common language(zapi hmanmi) ngeih ding hi a har ngai lai, nain ‘official holh’ cu a fawi tuk, CNLD kan tlin ahcun comman language kan ngei khawh lo zong ah official holh cu kan ser hrimhrim a herh tiah a chim fawn.

Thein Sein cozah nih Chinram official holh kong ah Chinram pengkip kal in mipi ruahnak an rak lakmi kha a diklo, mipi ruahnak lak loin an nawlngeihnak hmang in kan cawnter ko hna sehlaw kum tampi a rau hnu cun zapi nih kan hman khawh ko hnga tiah a chim chih.

Cozah nih Kawlholh hmanter an kan duh lio ah mipi duhnak an kan hal hmasa tung lo, mah ti cun pei an kan cawnter i atu cu zapi nih kan hman beh ko cu, Chinram ah official holh kan ngeih khawhnak ding caah aa-na-sin(dictator) pakhat a chuah ahcun a tha ngai lai tiah capo pah in a chim fawn.

Note: Kan hnu zarh June 7,2020 ah a chimmi a si. A chimmi dihlak ka tial kho lo, interview ah chimnak zawn 2:02:00 ah zoh khawh a si lai.

Caṭialtu: Salai Lungthli Tum