CNF Vice Chairman Dr. Lian Hmung Sakhong nih, “Kanmah Chin Ralkap hi inntek taktak cu kan si. Chin Miphun Ni a kan lawmhpi tu nan dihlak cung ah kan i lawm. Rampi Ruahnakpetu Daw Aung San Suu Kyi cung zong ah kan i lawm. Daw Aung San Suu Kyi hi Myanmar ram Ruahnakpetu lawng siloin Democracy ah kan nu bik zong a si.

Atu Chin Miphun Ni kan tuahnak khua Thantlang hi Pu Lal Luai khua a si. Pu Lal Luai cu kan caah nunnak a petu Chin mi kan pa asi. Nu hna caah biatak tein a rak cawlcang mi asi. Ni hin kan ram kan zoh tik ah Panglong Cahren chung um mi hi kan tuanchuah khawh lo caah nihin tiang ramchung ral a daih khawh lo hi asi. Cucaah atu lio remdaihnak kong ah hi Panglong Cahren chung a um mi hi tling khitkheh in kan tuanchuah a herh,” tiah a chim.

Relchih: Daw Aung San Su Kyi nih a chim mi bia. A Kum 72nak Chin Miphun Ni honnak ah Myanmar Ram Ruahnakpetu Daw Aung San Suu Kyi nih, “Chin Ramkulh cu thanchonak ah a der bik a si ko rih. Cucaah hi thanchonak a um khawh nakhnga, papek in Chin Ramkulh cu thanchonak rian kan tuan khawh tawk kan tuan. Chin Ramkulh hi ka phak a tam ngai cang.

Cu chung ah Chin Ramkulh cu intuar khawhnak le dinfelnak nan ngeih hi ka hmuh khawh. Cun Chinmi hna i zumhawktlak nan sinak zong hi kan upat hna. Cu zumhawktlak sinak cu Rampi remdaihnak kan tuahnak ah a herh bik mi a si. Democracy Federal ram kan ser khawh nakhnga kan zapi in kan tanti a herh,” tiah a chim. Credit: Democratic Voice of Chin-DVC