CNF Nih Chinram ah AA an Umter Hna Caah Har Kan Ton Tiah U Kyaw Ngying Nih Chim

CNF nih Chin ramkulh Paletwa peng chung ah AA hriamtlai pawl caankarlak umnak nawl an pek hna ruang ah Paletwa ah a ummi Chinmi tu harnak kan tong, tiah Khumi Affiars Coordination Council (KACC) Chairman U Kyaw Ngying nih a chim.

Paletwa peng khuasa Chinmi minung 10 an tlaumi kong he pehtlai in August 10 ah KACC nih cathanh an chuah i a tlaumi hna chungkhar pawl he an i ton than khawh nakhnga rak kan bawm hram u tiah nawlnak an tuah.

U Kyaw Ngying nih, “Paletwa hi harnak fakpi kan tong cang. Nitin ti awkin kahdohnak a um. Internet line zong atu tiang phih kan si peng,” tiah a chim.

Paletwa mipi tlaihkhih kan ton zungzalmi khenkhamnak caah CNF nih caankarlak chung Paletwa ah AA umnak nawl a pekmi hi a hrawh awk a si, tiah a chim chap.

“A ngaingai ti ahcun hi kong ah CNF zong tuanvo a ngei. Union Level kahdaihnak min an thut ah Chinram chung ah Myanmar ralkap, palik le CNF lawng umnak pawl a si tiah Dr. Sui Khar nih a chim bal. AA hi Chinram ah caankarlak chung umnak nawl kan pek hna an ti. Anmah nih cun caankarlak chung an umter hna nain kannih tu cu harnak kan tong. Cucaah, CNF nih caankarlak chung AA umnak nawl a pekmi hi a hrawh than awk a si,” tiah a chim.

2016 in AA le Kawl ralkap Paletwa peng chung ah an i kap i an umnak theih loin Paletwa mi a tlaumi an um bang in hramhram tlaihkhih, innzuat satil thahpiak, tlerhkhawn tukvelh tibantuk Paletwa mi hna nih an tong.

Paletwa ah hmun a khuarmi AA le Kawl ralkap kahdohnak ruang ah atu tiang ah Paletwa peng chung ah ralzam 3500 hrawng an um, tiah theih a si.

Ref- Chin World/Chin Journal