CNF Kan Fale Minung 24 Caah Bomhnak Kan Herh Hringhran Ko

Chin News

CNF kan fa le Sianginn Ngakchia (24) caah minung pakhat ah kumkhat ($1,400) bawmtu kan herh hringhran ko. Aizawl Nitlaklei Chinram kan khuapi i, CNF Office le an Sianginn kainak ah kumkhat $1,400 bawmh a hau mi CNF fa le hmanthlak pawl. Miphun hawi hna. A cung ah kan ttial bantuk in CNF kan fa le Tanghra (10th Grade/Standard) cung hi minung (31) an si i, Mizoram ah Siangiin kan chiah hna. Mizoram ah tanghra cung Sianginn ngakchia pakhat nih kumkhat an dih mi hi US $ in ($1,400) hrawng a si.

Nan theih bantuk in anu le apa CNF rianttuan lio mi caah mah bantuk fa le Sianginn kai ternak phaisa $1,400 va kawl cu thilrit tak tak,a fawi lo mi thil har tak tak khi asi. America ah kan miphun u-nau cheukhat sinin siseh, USA ah College a kai lio mi kan fa le cheukhat nih Front Education Group tiah min an pek i fun an kawlpiak nak hna thawng in siseh minung (7) sianginn kainak ca hi tlamtling in hmuh piak cang an si. Nain, a tang rih mi Sianginn ngakchia (24) ca hi bawmtu kan herh ngai ko. UCCF sinah Khrihfa bupi le Khrihfabu nubu nih bawmhnak hi pek ve an si nain, tanghra tang fa le ca le adang herhbau mi ah a kal chih i mah hna an ca hi a dang in kawl chih a hau. Vawlei cung ramttha a phan mi kan miphun vialte nih kan mah rian a si timi lungput te he khua nan kantuak pi cio nak lai kan nin nawl hna.

Image may contain: mountain, sky, outdoor and nature

A nai ah Arizona Chin Church, Phoenix in an Pastor Rev. Van Nuai Sang he kan ni chawn kho. An mah an Church ACC nih UCCF ah 1% pek hnu in, sianginn ngakchia pakhat cu kumkhat $1,400 in kan nin zoh piak chih hna lai a kan ti. Kan ni lawm tuk hringhran. Zaapi hmuh ding ah ka tar chih bantuk in an mah an Church hi an ngan lo. Nain, Hruaitu an ttha, Pastor ttha an ngei, member pawl pathian an thei. Member 68 lawng an si nain, Pathian nih an lungthin ah rian a ttuan i UCCF ah $500 an pek, an Nubu hna nih $200 an pek hlei ah $1,400 in CNF nan fa le kan nin zoh piak rih hna lai ti hi a mak, a sungluai tuk. Kan Chin miphun pumpak in siseh, a Khrihfa bu kip nih siseh kan ni zohchunh awk tak tak an si.

Khrih fa bu kip in siseh, a ti kho deuh mi pumpak le a khua bu in siseh, hi a tang mi CNF kan fa le (24) an siangiin kainak hi Arizona Chin Church bantuk in mission rian nan rak ttuan ve nak lai upat bochannak he kan miphun zaapi kan in sawm hna. Nan zaapi sin dawtnak he, Daniel Sakhong Chairman United Chin Christian Fellowship (UCCF)

Leave a Reply