CNF/A Leiin Mipi Dirkamhnak Statement A Herh Ngai Cang! Ralkap uknak duh lonak an langhternak sandahpiahtu an tam chin lengmang lei a panh. Caan tawite chungah Min Aung Hliang zong voihnih bakte biachimnak a ngei cang. CDM a siah mipi lam zawhnak a siah daih lei panh loin a zual lei a panh ko ahcun police lawng si ti loin ralkap hrut deuh pawl zong a thlah len te hna lai. Chin state hrawng ahcun an si tawn bantukin a cianh zong an cian khun te men lai.

Cucaah a herh ngai tiah ka ruahmi cu: Sandahpiahtu lungrual taktak a hau. Tlaih ding dirhmun a phanmi an um hmanh ah zapi in dirti- funtom ti zulhdawi ti a herh ngai. Ralkap an siah police an siah hrocernak le tukvelhnak zam tak loin tuar ahcun zapi in tuar ti, ttan ti le lungrual taktak in funtom ti hi a herh tuk.

Thin a phanmi cu an thazaang a der bik lio caan a si lai tiah zan tbk ah innn ah luhhnawh in tlaih le khih a um thluahmah te kho men. Ralkap pawl hi mifir fah in zan ah an vakmen te lai. Ralrin ding an um ngai kho men. Cucaah CNA/F leiin mipi runvennak caah kan mipi nan tlai kho hna lo, nan hrocer kho hna lo, harnak nan pe kho hna lo tiah Statement fiang ko le raltha taktak in an chuah zohzok a hau tiah ka ruah. An chuah cang hnga dek maw! Credit: Luther Tin Hre

Relchih: Kan ram hi thangcho ve seh timi kan duh. Kan fale chan ahcun Singapore bantuk in a nuammi le a rummi ram si ve seh timi hi kan chunmang cio a si. Cucaah tulio bantuk caan ah sungh zatlak ithim in Civil Disobedience a tuahmi le nunnak thap in zalampi ah a chuak i Ralkap uknak a dohtu hna hi ram dawtu taktak cu an si. An nunnak an sungh men lai. Sifak zong an tuar men lai.

Asinain an nun in ram le miphun an dawtnak tuanbia cu zungzal in a hmun lai. Kan ram le kan miphun dawtnak lungput he sungh zatlak ruat loin a nunnak a pemi tampi lakah Ralkap lei ttang in kan ram hi North Korea bantuk si ding ah a zei a poi lomi, a paw ca lawng a ruatmi Chin mi kha nihin thawk in an tuanbia aa thawk ve lai. An techin fapar chan tiang chim a si lai.

“Ram le miphun Ka dawt” tiah upa sinak aa cuh balmi vialte chung in a hodah a tak a si i, ahodah a deu a si timi Tuu le Meheh tthen in ram dawtu le a paw ca lawng a ruatmi cu fiang put in itthen khawhnak caan kan phan. Zeilam dah nan ithim cio lai? Nan tuanbia cu record in a um cang lai. By Zasang Cinzah