CM Lian Luai Nih Chin Party Faktuk In A Sawisel, Lentecelhnak Bel Bantuk An Si: Chin ramkulh Chef Minister rian tlai lio mi Pu Salai Lian Luai nih Falam peng chung a tlawnnak ah Chin party tiah auh mi CNLD a sawisel peng tiah theih asi. CM Pu Salai Lian Luai nih cun kan hnuzarh i Zongte a um lio ah, “CNLD party cu lu le taw hngallo party tiin rinhtlak le zumhtlak an si lo” tiah a chim ti asi.

Kan hnu thla i Ramthlo khua a tlawn lio zongah CM Lian Luai nih cun “CNLD cu Lentecelhnak bel bantuk men an si, a rauh hlan ah an kuai lai i, remh khawh zong si ti lai lo” tiin a rak chim bal cang. Hi kong he pehtlaiin Falam i CNLD hruaitu Pu Biak Cawm nih cun, “Mah hi daan a buarmi asi. Cozah rianttuan pawl haal in pengtlang a tlawn lio ah party campaign nak tuah lo ding tiin Daan chungah a um.

Tahchunnak a hmanmi Lentecelhnak bell bantuk men a timi zong tualchung i thil sunglawi kan neihmi man sunlawi zia a theih lo ruangah a chim men mi asi. Kannih Chin Party cun Lentecelhnak beel bantuk simi tual chungin mah kut chuak thilri ngaih khawh ding hi kan tumtahmi pakhat cu asi” tiah Chinland Herald sinah a chim.

Hmai kum ah rampi thimnak a um cang lai i, party kip nih timhlamhnak an ngaih cio bantukin CM Pu Salai Lian Luai zong atu hrawng cu zarhte ni le zarhpi ni tinte deuh in Falam ah kalin mipi hna he tonbiaruahnak a ngei peng,” tiah theih asi. CM Salai Lian Luai nih hin atu tiang rih ahcun Falam ah a um vemi USDP, NUP le UDP hna cu a soisel lo nain, CNLD party pakhat lawng hi a sawisel bikmi asi tiah Chinland Herald (CH) nih cun an langhter.

Editor note: Hi bantuk in Chin pa nih Chin patry a sawisel peng mi cu Kawl pawl an lungtling in an buk an bengh peng ko lai. Kawl kan duhlo ti lio ah Kawl ttenh in Chin miphun sawisel peng cu a ttha lo tukmi si. Cun, Pu Lian Luai nih hin Chinram i party dang USDP, NUP le UDP pawl sawisel loin amah a miphun party Chin party lawngte a sawisel cu khuaruahhar le mang bantuk asi. Cherhchan: Falamtimes