President Donald Trump le president Xi Jinping phone in an i chawnhnak ah cun China nih coronavirus cu kan tei cang tiah an chim. Cu caah President Trump zong nih China le President Xi cu a rak thangtthat ngaingai hna. A sinain US CIA pawl nih White House sin ah ralrin an peekmi hna cu China nih hin hi zawtnak kong ah hin lih an chim. A zawmi zat le a thimi zat an chimmi hi a dikmi a si lo. Cu caah China nih an chimmi hi zumh awk a tlak lo tiah an chim.

Kan hnu February ni 7 lio ah khan President Trump nih President Xi he tthate in phone in kan i chawn. Hi coronavirus dohnak ah hin tthawngngai le cakngai in ram mipi a hruai khawh hna. Hi bantuk in coronavirus dohnak ah a ram mipi a hruai khawh hna cu tiah a rak thangtthat ngaingai. Cu bantuk in President Trump le Vice President Mike Pence zong nih United States zong nih Beijing nak in cakdeuh in hi zawtnak hi kan doh in kan tei khawh lai tiah an rak chim phah.

A sinain American intelligence officials pawl nih cun Chinese cozah nih hi zawtnak in a zawmi zat an chimmi hi a dikmi a si lo. Hi kong ah Chinese cozah zong an lungre a thei ngaingai ko. Hi zawtnak hi Wuhan in ai thokmi a si bantuk in le a pawngkam hna le vawleicung ramkip ah ai tthekdarh tik ah hin an thin a phan caah a si. Ram chung ah hi zawtnak in minung tampi an thi ti an chim ah cun sualphawt le dantat kan si sual lai ti an phan caah a thimi zat le a zawmi zat hi tampi in an chim duhlo caah a si tiah The Times thawngzamhtu nih an chimmi cu an thanh. Ref: Dailymail