Chuncung Tlaihhrem a tongmi nute kongah Khuabawipa Biachim cu mak ko!

Chin News

Chun Cung Khuabawi: Tlaihhrem A Tongmi Kan Nau Nu Hi Kum 18 A Tling Cang. Chun Cung khua ah tlaihhrem a tong mi kong he pehtlai in kumtling lo a si le silo kong ah Chuncung khuabawi nih kum 18 a tling cang mi a si tiah CBN ah a chim.

“tlaihhrem a tong mi kan naunu kum 17 lawng a si rih an timi hi a hman lo mi a si. Chuncung khua kan nau nu hi kum 18 a tling cang. Tukum zong mee a pe ve tiah Chuncung Khuabawi nih CBN ah a chim.

Cu pin ah tlaihhrem tu mipa kong he pehtlai in “kan nau nu a tlaihhrem an ti tupa hi kan naunu a pa he kawifa an si i aa daw ngai mi zong an si hna. Kan nau nu a tlaihhrem an ti tu pa nih hin phaisa a thenh pah lengmang mi a si. Amah kan naunu zong nih an inn ah a va kal i phaisa a va hal pah tawn hna. Anmah pahnih kong ah thil fiang theinak ding caah atu hi Hakha sii inn ah an thi an kan chek piak lio hna a si tiah Chuncung Khuabawi nih CBN ah a chim.

Nawlnak: A luancia minutes 14 hlan ah privacy he ai pehtlai mi kan rak telhchih mi cung ah CBN nih careltu mipi kan zaangfah kan in nawl hna. Harnak a tong mi hna privacy kong ah CBN zong nih kilven piak ding hi kan i timh mi a si. Source: Chin Broadcasting Network

Tlaihhremnak kong he pehtlai in The Hakha Post nih an taarmi thil sining careltu nih nan i fianh deuh khawhnak hnga kan taar ṭhan.

The Hakha Post: Chuncung Khua Ah, Mitlinglo Kum 17 Nute Kum 49 Upa Nih
Tlaihhrem

Hakha Peng, Chuncung khua ah khuami pakhat nih a tlamtling lomi kum 17 upa pakhat cu 2020 November 12 suimilaam 2:00PM tluk ah a tlaihhrem tiah Hakha palek sakhan in thawng kan theih. Tlaihhremtu pa hi kum 49 upa nupi fate a ngei cang mi a si. Atu hi Hakha Palek sakhan ah an chiah tiah theih a si.

Tlaihhrem mi kong he pehtlai in tlaihhrem a tong mi nute i a pu Bik Te nih, “2020 November 11 ahkhan tlaihhremtu pa, Pa…. nih tangka Ks. 2000 a thenh. Cun, a thaizing November 12 zaanlei suimilaam 2:00 tluk ah a sualpi. Nute nih a chim ning ahcun, an inn ah a ka kalpi i, an ihnakkhan ah a ka sualpi. A voi khatnak ahcun a lei in ka chiatha a ka liahpiak.

Cu dih hnu ah pa a sinak in a ka tuahpiak tiah a ti. Hi kong ahhin tlaihhremtu pa lei nih remnak ser ding in an rak kan ti nain kan cohlang lo,” tiah The Hakha Post ah a chim.

Atu tlaihhrem a tongmi nute hi a nulepa nih an thih tak cang mi pum tlamtling lo le mi tlamtling lo ngaimi a si. Cun, Hakha pum tlamtlinglo zohkhenhnak zong ah an rak chiah bal. A pa hi Mizoram ah tii in a paam. Nute hi chuahpi unau minung panga an si i, amah hi upa cem a si tiah kan theih.

Cun, hi kong he pehtlai in Hakha Palek sakhan lutlai nih, “2020 November 17 ah report nak an rak tuah. Report an rak tuah le cangka in Palek lei zong nih action laak colh a si. Zeitik indah biaceih zung nih auh an si lai ti cu kan thei kho rih lo. Cun, nute hi sii-inn lei tuanvo ngei hna zong nih 2020 November 26 ah zohfelnak an tuah cang, a phi tu cu a chuak rih lo,” tiah The Hakha Post ah a chim

Remnak an ser mi kong he pehtlai in Bik Te nih , “Remnak ser ding ah anmah chung lei in minung pahnih nih an rak kan len. Hi an kan leennak ah anmah lei nih Siapi pathum kan in pek hna lai, cun nau a pawi a si cun kanmah nih tuanvo kan laak lai tiah minsen an thut. Remnak kan ser mi zong hi November 25 ah a tlamtlin lo a si cun, Palek sakhan ah kan kal lai tiah biakamnak kan tuah. November 25 a tling i zeihmanh lehrulnak le leennak ti bantuk a um than ti lo ca ah Palek sakhan lei ah kan kal hi a si,” tiah a chimchap.

Hakha Pengkomh in kum thum chung ah atu bantuk in tlaihhrem atu in voi 8 tiang a um. Hi voi riat chung ah voi 6 hi cu case zong a dih cang i, Kanpetlet le atu hi a taang. Hi chung ah kum 20 chung thongtlak a tong mi zong an um. 2017 kum hnu i a cangmi a tam deuh cu kum 10 deuh in thong an tla tiah kan theih. Atu bantuk in tlaihhrem tu pa cu ပ 150/2010 zazatatkyi pohma 376/377 in case an tuahpiak tiah theih a si. Source: The Hakha Post

Admin hmurka: Chinworldnewsvening nih thawngpang kan ṭialmi hi kanmah nih kan phuah cawpmi kan ṭialmi a si lo. Mipi sinah adikmi thawngpang zamh hi kan i hmuitinhmi a si. Cun, thawngpang kan ṭialmi hi areltu mipi caah ṭhathnem santlaih, theihtleih ṭha siseh ti hi kan i hmuitin bikmi a si. Asinain, minung kan ti cu tlamtlinlonak tete zong a kho mi a si caah thawngpang kan ṭialmi kan palhnak a um  cun theihter khawh peng kan si.

Mipi sinah thawngpang thlazamh piak na duh si cun zeitik caan paoh kan i thlahzamh piak khawh zungzal hna. Kan thawngpang ṭialmi kongah, pehtlaih a duhmi nih Salai J Vanduhthar Lahnin ah pehtlaih khawh peng kan si. Na relmi thawngpang hna hi midang nih an rel khawh ve nak hnga aṭha tiah na ruahmi a um ahcun share in rak kan bawm ve. Kan ca a kan rel piaktu nan dihlak cungah kan ilawm. Upatnak he Admin

Leave a Reply