A cozah nih coronavirus dohnak ah tuahmi rammi a ho hmanh leng chuaklo ding timi a ngei lomi minung 233 bak tlaih an si cang. Cu lawng silo in minung 72 hna cu report (FIR) an tuah chih rih hna. Motor an tlaih cangmi hi 378 a tling cang tiah an thanh. Hi bantuk in thil a cannak hi India ram Arunachal Pradesh ah a si.

Arunachal Pradesh police hna nih cun hi bantuk in hmai lei zong ah nawl a zul dih lomi hna cu an cung ah pehzulh in rian kan ttuan lai tiah an chim chih. Police official hna nih hi lockdown caan kan hman cuahmah chung ah hin cun mizei hmanh thleidannak umlo in an cung ah rian kan ttuan lai. Hi phung hi fekte le felfai taktak in kan zulh lai tiah an chim. An chim chih rihmi cu hi bantuk in phung a buaimi hna phaisa kan cawi termi hna hi thong sawmli (Rs. 40,000) hrawng a si cang tiah an chim chih.

India ramchung ah hi zawtnak a ngei tharmi hna hi minung 354 bak hmuhchuah an si tthan. Ram pumpi ah coronavirus a ngei tiah theih cangmi hna hi minung 4421 an tling cang. Hi zawtnak a thihpi cangmi hna hi 114 an tling cang i a damthan cangmi hna hi minung 326 an tling ve cang tiah an chim. April 14 pinlei zong ah national lockdown hi pheh tthan te khawh a si tiah an chim chih. Ref: Vl+