CHRISTMAS LE CATHIANG: Christmas timi biafang phen ah a ummi biatak cu nu nih pa ci tel loin fa a pawi i Fafa a hrinmi kha a si. Hi kong he pehtlai in Cathiang nih a hmaisa bik ah a rak chimmi cu Hramthawknak (Genesis) dal thum câng hleinga nâk hi a si. “Cun minu he nan karlak ah ralnak ka chiah lai i na tefa le a tefa zong ral an si lai.

Nang nih a kedil kha na khuai lai i anih nih na lu kha an khuai lai” Hra. 3: 15. Hihi Adam sual i a tlukni bak ah Pathian nih Sehtan nih a hmanmi Rul sinah a chimmi a si. Hlengtu rul le a hlenmi minu karlak ah ralnâk lawng si loin hlengtu ‘rul tefa’ le hlenmi ‘nu tefa’ i ralnâk ding zong chim a si.

Rul tefa: Matthai dal thum câng sarih le dal hlei hnih câng sawmthum pali le dal kul le dal thum câng sawmthum le pathum ah tipil petu Johan le Jesuh nih ” Rul tefa hna” tiah an timi kha rul tatak si loin minung chimnâk lawng te a si. Cuticun Pathian nih Eden dûm ah a rak chimmi ” Rul tefa” timi Cathiang kha a tatak in a tling.

Nu tefa: Ngaknu thiang nih fa a pawi lai, fapa a hrin lai i a min ah Immanuel tiah an sak lai. Isa. 7: 14.(Baibal Cathiang țianning) Adam sual i a tluk ni bak ah Pathian nih a rak chimmi ” Nu tefa “timi kha BC 700 hrawngah Pathian nih profet Isaiah hmangin a hun chim țhân. Ngaknu Thiang nih fa a pawi tak tak.

“Josef, David fapa, Mary hi na nupi ca i țhit kha țih hlah, zeicatiah fa a pawimi hi Thiang Thlarau sin in a si” Mt. 1: 20. Vancungmi nih Mary sinah nau na pawi lai tiah a rak ti lio ah Mary nih cucu zeitindah a si khawh lai pa ka hngalh rih țung lo tiah a rak ti. Lk. 1: 31- 35 Cucaah Cathiang nih “Nu tefa” tiah a timi hi pa ci tel lo bak in pawimi Mary Fapa Jesuh Khrih chimnak a si.

Cathiang nih a rak chim chung bangin nu tefa Jesuh a chuah ah khan rul tefa minung nih doh le ral hram a thawk cawlh i miphun pakhat siangpahrâng a simi Herat nih fa chuakka ngakchia sem, ‘nu tefa’ Jesuh that dingin a ralkap kha vainam he a pawhter hna i Judia ram chung kum hnih tang pa ngakchia vialte an rak thah nâk kha a si. Mt. 1: 16- 18. Hi thil a cangmi hi Adam sual i a tluk ni bak ah Eden dûm ah a palh kho lomi Cathiang nih, rul tefa le nu tefa i ral lai nâk kong a rak chim chungmi a tlinnâk a si.

Cathiang nih a rak chim chung bangin rul tefa minung nih nu tefa Jesuh cu Vailamtahnak thing cungah a kut le a ke ah thir in a khenhchih i ” Nang (rul tefa) nih a kedil kha na khuai lai” tiah Cathiang nih a rak chimchung mi bia kha a tatak in a tling.

Ni thum ni ah ‘nu tefa’ Jesuh cu thihnâk thlanmui chungin Pa Pathian nih a thawhter i “Anih (nu tefa) nih na lu kha an khuai lai” tiah Cathiang nih a rak chim chung mi kha a tatak in a hun tling țhan. Sehtan le sual țhawnnak cu zungzal ca in tei a si cang. Cucu ‘anih nih na lu kha a khuai lai’ tiah Cathiang nih a chimmi sullam tak tak cu a si.

Cuticun Christmas le Cathiang hi țhen awk țha loin ai pehtlaimi a si caah Christmas a hmangtu Christian hna nih kan zoh, kan dothlat i kan zumh or kan cohlan i nunpi hrim hrim a herh. Christmas le Cathiang thluachuah daih nak cu caretu nan cungah um ko seh. CHRISTMAS LE PROFET tiah peh a si te lai. Even Ruak Uk