KAN CHIN RAM AH PARTY PIN AH A MINUNG THIMTHIAM A BIAPI TUK: Kan Chinram ah CHIN minpu party a herh tuk kan ti cio ko. A cunaak zong cun a ttuantu a minung hi thimthiam a herh hrimhrim ko tiah ka ruah. Zei caah tiah a voikhatnaak hluatdaw term ah khan Chin State MP ah CHIN party hi mi tam deuh an si. A cu lawng si lo in kan CHIN State hluatdaw ah kan Chin miphun lawngte an si dih ko ti awk a si, ralkap ai awhtu tilo paoh cu.

Mah lio ah kan M P hna le hluatdaw nih kan CHINMI hna caah a herh tukmi kan nun phung le upadi tete zulhawk tampi kan herh tukmi ceihnaak le zulh awk phung hna chim awktlaak in an ceih an chahmi ka thei lo. Thing ram zusa ngacel tibaktuk neknawi tete cu an hei tuah ve ko nain a herh taktak deuhmi KAN CA, KAN HOLH, KAN NUNPHUNG kong ngaingai an ceihchah mihi ka thei lo. A ruahawk an theih lo maw si an thiam lo maw an ral dik a chia.

Hi hi miphun dang nih cun maw an kan ceih piak hnga. Party nih dah an ceih hmasa kun hnga? Atu ah miphun dang hna nih kan Chin nu hna laak in an hrawhhralhmi hna le an hlonh ko mi hna cu zei ban tuk phung in dah kan zulh ve lai i kan dirpi ve hna lai timi hna kan ngeih ve ttung lo mi hi cu a poi tuk hringhran ko ka ti. Myanmar bohdahbata nu kilvennaak hna cu upadi le phung an ngei cang cumu. Mi thah lainawn bia kong kau ah kan Chin miphun dihlak huap kho dingmi remdaihnaak le phung lam hna aa khat te in kan ngei kho rih lo.

Chin Act kan ngei kan ti na in kan miphun dihlak huap in zulh awk a tthat lo naak a tampi. Cu ban tuk in criminal procedures zong kan Chin miphun he aa tlaak ning in remhawk a tampi. Nupi tthit va ngeihnaak nun phung zong Chin miphun aa khatmi dihlak kan ngei kho rih lo. Kan Chin Hluatdaw nih an ceihmi a tam deuh hi sianginn siinn va peeknaak luklak le lam le sul kong men lawng a tam deuh rua ka ti.

MP rian taktak le hluatdaw tuah ding an theihlo ca ah maw a si hnga. Kan mah Chin Sate ah kan mah miphun te kan si ko ttung. Party cu zei party hmanh va si hna seh law kan Chinmi nih kan Chin miphun le Chin ram ca ah ceih le ttuan awk a si ko ttung. A ttuan zia kan thiam lo le kan theih lo bia zong hi a si pah ko rua tiah ka ruah. Cucaah atu a ra laimi caan hi cu a party lawng zong zoh si lo in a ttuan thiam dingmi a hngal khomi Chin ram le miphun a daw taktakmi hi a minung hrimhrim zong in zoh fel le thimthiam hi kan hau cang ko rua tiah ka ruah. Credit: JP Biak Tin Sang