Chinnu Nih Miphun Dang Pa Vat Kongah:Ram thumnak ahcun mi phundang hna he cawh thup in khuasak ti le rian tuan ti le sianginn kai ti kan si tikah mi phundang nu/pa he duh dawtnak hri i sih a fawi te.

Atu hmanh ah hin Chinmi lak ah Mi phundang pa he duhnak hri a sih ziar liomi le a vat cangmi zong an um len. Hmailei ahcun hinak in miphun dang a vatmi an tam chin lengmang ko lai. Kham kan i zuam sek len zongah cu tlukin kan kham kho lai lo.

US ah a thang lianmi kan Lai nungak thenkhat cu an mit zong a saang ko kan ti cun kan palh tuk lem lai lo. Chinpa theng a hau lo a timi Chinnu zong an um pah len cang. Kanmah Chinmi hrim nih mi phundang pawl khi kan zoh saang deuh ziar bantukin Chinnu zong nih Laipa nakin Miphun dang pa an i zohtla deuh i an zoh saang deuh khawh hna khi Lainu pawl an mawh ve lo.

Atu ning in cuanh ahcun US le Ram thumnak ah miphun dang hna he cawh thup in a tlawng lengti mi le a thang lianmi Lai Nungak Cheu thum cheukhat hi cu Mi phundang pa an vat te ko hna lai i miphun dang ta an si te ko lai. Chin pa nih an co kho te hna lai lo.

Chinnu Nih Theih awk

• Lainu nih Miphun dang pa na vat hmanhah Mi sawhsawh a si lomi le zumtu Khrihfa a simi te vat i zuam. Miphun dang si chin chap, Zumtu Khrihfa biaknak a si lomi pa cu zeitik hmanhah vat i tim duh hlah.
• Lainu nih miphun dang pa na vat ahcun na hrinmi na fale cu 100 ah 80 in mi phundang an thitvat nak ding lam a um cang. Na hrinmi na fale cu Chinmi zong an si ti hnga lo.
• Chinmi ah kan farnu Pengtlang dang pa he hmanh i thit-umh cu mah pengtlang lei nih kan duh pah ziar tawn lo. Lainu nih Miphun dang pa vat chinchin cu Chinpa nih kan duh hrim lo i kan lung a rak fak ziar hrim ko.
• Lainu nih mi phungdang pa na vat ahcun Chin miphun tlaunak lam 100% ah 80% in a um. Thenkhat nih cun Miphun tlaunak bak a si an ti. Laipa nih mi phundang nu a thitmi nakin Lainu nih miphun dang pa nan vatmi cu Chin miphun caah thil poi deuh a si ko.
• Chinmi cu Milu zongin kan tlawm rih caah Chin nu hna nih a si khawh chungin Chinmi a simi te vat i zuam ko sawh uh.

Chinpa nih Theih awk le Ralrin awk

• Lainu pakhat khat nih miphun dang pa a vat tikah a herh hlei in bia chia kha kan chim lo le kan phunzai lo ah a tha. Kan lung a fakmi cu kan mawh bak ve lo.
• Minung nih nawl le covo timi kan ngei cio hna i Lainu zong nih pumpak duh thimnak nawl le covo a ngei ve.
• Lainu pakhat nih Miphun dang pa a vat tikah bia tha loin le bia fakfak in na soisel na thlanglamh ahcun a nuhrin covo na buar piak ti khawh a si lai. A duh cun taza zong an cuai khawh ti kha rak thei law biafak le bia chia kha i sum deuh.
• Chinnu nih Miphun dang pa a vat tikah Pathian khuakhan ah hei ruat ko u sih law cu tlukin kan vuivai hnga lo i cutlukin kan lung zong a fak hnga lo

Tlangkawmnak ah

Miphun dang thit vat hi mi zei miphun paoh nih Kham an duh ciomi a si ko nain an kham khawh lomi thil a si ko ti cun kan palh tuk lai lo. Chinnu nih miphun dang pa a vat le vat lo cu amah nawl le amah duh thim bak a si ko i “Nupi Pasal caah cun zei miphun an si hmanh ah a fimmi le dawtu taktak a simi a tha bik.” ti a si caah Miphun dang pa he an i duh dawt i an i thit um cun anmah caah cun a tha bik ko lai.

Zukhmawn phunkip a tawngmi Chin pa nakin thianghlim tein a ummi Miphun dang pa cu Pathian zong nih a duh deuh i a lung a ton deuh bantukin Chinnu zong nih a duh khawh deuh ve ko lai. Chinnu nih Mifel lo le Pathian a tihzah lomi Chinpa sin kal nakin a ding felmi le PATHIAN a tihzahni Miphun dang pa sin kal cu an i duh deuh ko lai. Cucaah Chinnu nih Miphun dang pa an vat zongah an mawh lo ti khawh a si ko hnga.

Ramleng ah hin “Laipa caah Lainu, Lainu caah Laipa” ti hi a si zungzal kho ti lai lo. Chinmi ram leng kan pemnak chan hnihnak le chan thumnaak chan ahcun “Laipa caah Lainu, Lainu caah Laipa” ti hi Laimi caah chim a har chin tuk cang lai. Ngaihchiat awk ngai zong a si ko.

Zeiti a va si ah Catialtu nih cun Miphun dang pa vat cu tha ka pe hrimhrim lo tiah ka cabia ka donghter. A rak Rel khotu cungah tampi kai lawm.
– Satu Kmc. ( Bawihrin Sang )

Note: Hi cabia hi Bawihrinsang worpress ta lakchinmi asi.