New Delhi: Nikhat chung lawng bak ah coronavirus a ngeimi minung 235 an i chap. India ramchung ah hi zawtnak in a zawmi dihlak hi minung 2069 bak an phan cang. Cu chung ah a thimi hi 53 an tling cang tiah Union health ministry lei nih an thanh. Health ministry nih a chim chih rihmi cu hi a zawmi chung ah active cases hi minung 1860 bak an si i minung 155 hna cu an dam tthan cang tiah a chim chih.

UN human rights chief zong India ram ah khua a sami ralzaam pawl kong ah a lungre a thei ngaingai cang. Hi zawtnak ramchung ah a karh lo nak ding caah tiin a cozah nih leng chuaklo ding le rian ttuan rihlo ding in thawng thanh a hung si. India cozah nih ni 21 chung bak lockdown a tuah tik ah raalzaam dirhmun in khua a sami pawl khuasaknak kong ah lungrethei ngaingai a si tiah a lungretheihnak a langhter.

Prime Minister Narendra Modi nih kan hnu March thla ni 24 thok April 14 tiang ni 24 chung bak national lockdown a thanh. Cu tik ah India ramchung ah raalzaam dirhmun in khua a sami hmun kip ah rian a ttuanmi vialte an rian in dinhter viar a hung si. Cu caah nikhat ttuanmi a ei chommi raalzaam pawl ca ko ah hi lockdown nih hin harnak tampi a chuahter.

Kan hnu February ni 15 hnu in India ramchung ah a rak lutmi ramleng minung vialte hna zong erh an si. Zawtnak an ngeih le ngeihlo ai fian hlan chung paoh cu eih dih ding ti a si. Cu hnu ah nawlngeitu hna nih zawtnak a ngei loh ti ah tthate in thanh hnu lawng ah an ram lei ah kir sianh an si lai tiah an chim. Ref: Times of India