Chinmi minung pa 3 motorcyle in fak tuk accident an tong

Chin News

Accident thawng- Yazachu khua pawngah tuzaan lei sumilam 4:00 tlukah Zohnuam khuami motorcycel in accident an tong tiah theih a si. Accident a tongmi hi minung pathum an si i, an pathum in motorcycle ah a cuangmi an si tiah kan theih.

Image may contain: one or more people and people sitting

Zohnuam khuami in motorcycle accident a tongmi minung pathum hna cu Zatlang bawmhnak phu mawṭaw in Senpi sizung ah tlikpi an si hna tiah kan theih. Accident a tongmi hna cu, hliamhma fak ngai an tuar. A mawngtu hi pa a si i a dang pahnih hi nu veve an si.

Image may contain: one or more people, outdoor and nature

A mawngtu pa cu a lu ah fak ngaiin a hliamkhawng. Cun, a dang a phorhmi hna nu pahnih zong an pahnih tein an kut a kiak veve tiah theih a si. Sizung ah an zohkhenh/thlopbul lio hna asi i an thawngpang thar a um rih lo. Thlacamnak in bawm cio hna usih!- Zalen

By Salai Pa Thawng-Family Politic Si Loin National Politic In Khua Cuanh Hna U Sih: Salai Pa Thawng|Kan ram cu Buddhist ram ah ser an rak duh. Kawlram tuanbia kan zoh tikah uknak tha lo pawl ruangah Biaknak pakhat lawng um lai i cucu Buddhist biaknak lawng a um lai ti a rak. Nihin ni tiangah Khrihfa ram a simi Chinmi kan cungah biaknak zalonnak a um lonak a langhnak cu Chinram a rak tlawngmi Kawl hruaitu lutlai pawl khi zarhpi ni dah ti lo Chinram an ra bal lo.

USDP chan lio cu uknak chiahru an si tiah kan rak ti hna nain NLD chan ah zei hmanh a hlei lo. Suh Kyi lila zarhpi ni ah Chinram a tlawn. Zarhpi ni lawngah kaa manh tiah bia a kawl. Ziah Chinram cu Khrihfa ram a si i an Pathian biak ni a si ti a theih ko caah biaknak zalonnak a pek ko ahcun zarhpi ni thengte Chinram rat loin a rian sersiam awk a tha lo ma? Pumh thiam loin zung riantuantu le sianghngakchia vialte bawi donnak ah an kalter dih hna.

Kawlram cu Buddhist ram ah an ser kho lo nain nemte in biaknak hnursuannak cu a um peng ko ti cu al hau loin a lang. Cozah kum 4 renglo an tlaih lioah Biakinn caah phaisa hlut cu chim lo innhmun an pe duhlo mi hmanh an um lioah thimnak lai ah Biakinn saknak phaisa cu an bawm zawkzawk hoi hna. Biakinn saknak phaisa an bawmh hna i lawmh a um nain cu nakin kan vawlei cia ah Biakinn saknak hmun tu kha kan pe colh kho hna sehlaw a tha deuh.

Warahthu, Hla Shwe le Ko Ni thahtu pa nihin tiang an tlaih hna maw? Nain Rev. David La cu fawi tein phung na buar tiin an tlaih khawh colh. UBP Chairman Kyaw Myint cu an tlaih hoi.Cucu a dikmi zalonnak cu a si tak tak ma?

State vialte hloh an kan duh. Ram le vawlei ngeitu hloh an kan timh. Chin miphun kan si i kanmah duhthim si loin Pathian nih Chin miphun ah a kan ser. Cucaah Kawl pawl nih Kawlram chungah State um loin kan dihlak in Kawl kan si lai an rak ti. Chin kan sinak hi fawi tein chuh khawh mi a silo. Cucaah kan Chinram hi Chinmi nih dirkamh a hau zungzal mi a si.

Kan Caholh an kan hmanter kho ti lo. Chin kan si cangka in Pathian nih caholh a kan pek. Kan ram le kan vawlei cia ah kan ca le kan holh hmanh in cacawnnak an kan hmanter khawh lo hi ruah a cu cang. Chin miphun kan si a langhnak cu kan caholh hi a si. Cucaah caholh a ngeimi kan si caah kan ca le kan holh in cacawn khawhnak lam kan kawlhau

Kan Nunphung a thlum al kho ti lo. Chin kan si bantukin Chin kan sinak hmelchunh a ngeimi kan si.Chin nunphung cu Chimmi caah si i Chinmi lawng nih a takin a sunlawinak kan hngalh. A hleice in Nunphung kan sunsaknak ni sunglawi kan i ngeih i Chin Miphun Ni le Tho(Chin Kum Thar) an si. Kan Chin miphun caah tuanbia a ngei i a sunglawi in kan hmuhmi ni le caan hi cozah zungkhar ni ah an kan tuahpiak duhlo.

Kan Vawlei le ramri a him kho ti lo. Chin miphun kan si bangin ram le vawlei a ngeimi kan si.Nain kan ram le kan vawlei cia ah a ngeitu nih kanmah duh in tawlrelnak nawl kan ngei kho lo. Sakmi inn hmanh an kan tthehpiak i cu hmun cu sifak caah innhmun kan samh an ti i sifak caah sing 100 cungin an zuar tthan. Docawi in cawk a si i tahchunhnak ah ni 45 chungah nan sak dih lai tiah nawlchuah a si tthan hoi.

Innhmun cawknak docawi he inn saknak he a dihlak sing 250 tluk a hau. Inn cu sak zawk zawk uh ti a si hoi i cu chinchap ah inn saknak ah tiah thing an phor i an tlaihpiak tthan hoi hna. Chinram i innhmun an chuhmi hna cu an zuar i a man hmuhmi Kawlram cozah sinah a lut than hoi. Hakha minung 40000 tluk khuasaknak khi innhmun cawk khawh lo ruangah Kawl nih an cawk lai i an kan chilh sual lai ti phang a um.

NLD le USDP in aa zuammi Chinmi an si ve ko ttung timi biahalnak a um tawn. A si Chinmi an si bak nain Chinram caah papek in zeidah Policy an ngeih? Chin Miphun Ni zungkhar ni caah siseh, kan ram le kan vawlei tawlrelnak caah siseh, kan ca le kan holh tawlrelbak caah le kan ramri tawlrelnak caah NLD le USDP nih zei policy dah an ngeih?

Transparency timi NLD an bia a si nain transparency muithlam a leng ti lo. Remdaihnak an ti i buainak a zual chin. Democracy an ti i tlaihkhih a tam chin. Tu zongah NLD nih CNLD manifesto a simi mahte khuakhan lairelnak kong rampi TV in biachimhnak lam a phihpiak than hoi hna. A luancia cozah nih pehtlaihnak pohmah in minung 11 thong an rak thlak hna nain NLD nih 153 thong an thlak hna.

NLD an kai cangka in fimthiamnak kan niamnak a ruang cu lam le sul that lo ruangah a si tiah Chin MP(NLD) nih Suh Kyi sinah an chimhmi a si.Nain tu ah Mara lei siseh Hakha peng khuate lei cu lam a pemh dih i lam le sul cu a tha tak tak maw? Cucaah Chinmi nih kan herh bik le kan duhmi cu Chinmi lawng nih kan theih caah CNLD hi vote cio ko u sih.

Leave a Reply