Chinmi hna nih Esther Dawt Chin Sung an ṭanh tuk nak Au thawng

Esther Dawt Chin Sung hi Chinmi hna nih a tu tiang zongah hin kan ṭanh tuk mi le thazaang kan pek tuk mi a si, a ṭahbek tuk kan ti mi zong hi kan soisel si loin kan ṭanh tuk ruang tu ah a si deuh ti hi Esther zong nih rak theithiam seh law a ṭha ngai ko hnga. A voi-1-nak a ṭah lio ah khan cun chinmi hna nih kan rak ṭahpi ve i kan rak lawmhpi tuk ve.

Atu cu a herh lo tuk tiangin a ṭah tawn tikah a hawile le miphun dang hna an hmai kan khap ti hna lo i, kan rak ṭanh tuk fawn tikah ṭap lengmang ti hlah seh, i sum deuh ve cang seh ti kan duh ruangah a ṭahbek tuk tiin kan chim lengmang nak a ruang cem cu a si. Amah Esther hrim hrim zong nih Chinmi hna Au thawng cu a rak theih dih ve i, atu cu ka lung ka ṭhumh deuh cang lai i, i sum khawh kaa zuam ve cang lai a ti.

Kan Chin miphun hawi a si mi le kan Unau nu, kan farnu a si mi nih cu bantuk bia a vun chim tik ah cun, a mah Fans a si mi hna nih a ṭahbek tuk kan ṭanh ti lai lo, tha kan pe ti lai lo a ti mi hna, mi tampi hna nih a tu ah cun ṭanh ṭhan le thazaang pek ṭhan an i tim dih ṭhan cang.Esther nih hin hi bantuk bia hi chim hlah hmanh seh law, Chinmi hna nih cun a ṭahbek tuk kan ti ko bu zongin kan thinlung chung tak tak in cun kan ṭanh tuk peng ṭhiam ṭhiam ko i, thazaang zong kan pek peng ṭhiam ṭhiam ding a si ko ti hi 100%100 in a fiang tuk mi a si.

Chin miphun cu miphun tlawmte kan si i, miphun dang hna lak ah cun kanmah le kanmah hi kan i ṭanh khawh chungin kan i ṭanh ding le thazaang kan i pek lengmang ding a si ti hi, Chinmi vialte hna kan lungput si zungzal hram ko seh. Esther Dawt Chin Sung zong Next Round zongah teinak a co ṭhan khawhnak lai, Chinmi vialte hna nih kan umnak hmun cio in thlacamnak he rak bawm lengmang cio hna u sih. Credit: H. Bawitumthang Thangte