Cacawn nithumni zingka (tuzing) ah khan Chinese Covid-19 thlawpnak ah mithiam pawl hna cu an sii le an hriamnaam hna he Yangon International Airport an phan cang tiah Myanmar coronavirus dohnak lei ah rian ttuantu sin in theih a si. Hi a rak phanmi pawl hna hi Yunan hrambunh pawl an si i minung 12 an si.

Myanmar’s Health Ministry nih coronavirua nih a chuah pimi harnak kan dohnak ah hin hi team hna nih hin a kan bawmh lai. An mah nih an hmuhton ciami (experience) hna hmang in hi coronavirus hi zei tin dah kan dohning a si lai i hi zawtnak in a zawmi pawl zeitin dah kan thlawpbul hna ning a si lai timi an kan chimh cawnpiak lai tiah a chim.

Hi mithiam pawl hi ni 14 chung um ding in an i tim. Hi ni 14 chung ah tuah an i timhmi cu an hmuhtonmi thil pawl hna chimh le Myanmar sii lei mithiam pawl hna coronavirus dohnak kong cawnpiak a si. Cun National Health Laboratory hna he i bawm in Covid-19 an ngei maw ngeilo timi mipi hneksaknak zong an ngei la. Nikhat ah minung 200 hneksaknak ngeih ding in timhtuah a si.

Myanmar Health Minister Dr. Myint Htwe nih hi bantuk in mi tampi zawtnak hneksaknak khawhnak thilri (laboratory materials) pawl hna he a rak phanmi team pawl cung ah kai lawm hringhren tiah thawngzamhtu pawl sin ah airport i an va don hna lio ah a chim. Ref: Irr