China ah Khrih Thawngṭha aupitu hna dirkamhtu an karh chin lengmang cang. Dawtnak, Daihnak le hnangamnak Pathian kong a aupitu an si tiah an ti hna. China rammi hna lungreithei vansang au in an hrum lio caan le ngaihchia in caan an hman lio caan caah Khrihfa zumtu hna nih ralṭha in Khrih Thawngṭha faak piin an aupi ve i vawlei pi khuruahhar in a um.

 

Atu lio China zawtnak ṭihnung ruangah a thimi mi hi 1700 leng an si cang i 71000 hrawng dam loin an um cang i zawtnak a karh chin lengmang cang. China ramchung a ummi mipi nih lungrethei vansang au in caan an hman le an hrum lioah Khrihfa zumtumi hna nih caan rem caan ṭha ah hmangin Khrih Thawngṭha an aupi thluahmah ve cang.

Pastor Paul Washer nih phu pakhat a dirhmi “Heart Cry” chungah ah a ummi chungtel (members) hna nih lampi ah kal in Khrih Thawngṭha heh tiah an aupi cuahmah ve. China ram cu atu lio hmaihuhnak (Mask) cawn ding zong ahar ngaingai cang caah, Khrihfa zumtumi hna nih cun Khrih Thawnṭhan aupi pah cun hmaihuhnak (Mask) cu heh tiah an phawtzamh chih hna.

Hi zawtnak ṭihnung Coronavirus hi zawr lei panh loin a karhtu in a karh chin lengmang caah thihpang ngaingai a si cang. Mizaw an karh hleiah mithi an tam ve. A damnak sii an hmuh khawh lo fawn tikah Coronavirus zawtnak a ngeimi hna cu lungkuai hnabeidong in an hrum an au hna. Zaangfaak ngaingai an si hna.