China nih US Senator Rick Scott sinah, vawlei cung ramkip nih Covid-19 khamnak sii(Vaccine) serchuah timhin kar an hlangning cu China in hnahnawhnak pek la caan tlaiter aa tim tiah a puhnak cu tehte kan hmuhsak tiah a ti. China nih Covid-19 khamnak sii serchuah aa timmi ram hnahnawhnak pek a timh hna timi tehte cu kan hmuhsak tiah Senator Ric Scott cu lehnak an tuah ve cang.

China Foreign Ministry biaphuangtu Hua Chunying nih cun,“US senator nih Covid-19 khamnak si (vaccine) serchuah aa timmi hna hnahnawhnak pek a timh hna tiin a puh hna i, hihi tehte ka hmuhsak sehlaw ka duh. Chim ngam lo dingin zeihmanh a um lo,” tiah US Senator Rick Schott biachim cu lehnak a tuah.

Hi lio ah hin US President Trump le US top Official hna nih cun Corona Virus zawtnak hrik a karh cuahmahmi kongah China cawlcanghning hi voitampi a soisel cang. Asinain, China nih Corona Virus a dohnak ah thil thup ngeiin loin fianghlang ngaiin thil an kalpi ko ti a chim ve ṭhan.

US Senator Scott nih Pathianni BBC nih biaruahnak an ngeihnak ah China a lunghrinhnak le a puhnak hna cu a chim i Intelligence hna sinin a theihmi a sinak zong a chim i, thil dang tu cu a chim chap duh lo. A biachim holhrel zoh tikah chim ding tampi ngei sehlaw a dawh ngai.