Admin||04 Vaupi 29-2020|| A tu lio ah a hung laar ngaimi thawng pakhat cu Chinese minung pathum tlaunak kong hi a si. Hi Beijing hrambunh internet activists minung pathum hna hi coronavirus kong online ah an ṭial ruangah China police nih an tlaih hna a si lai tiah an chungkhar hna nih cun an chim. China hi coronavirus kongah soisel an ton lio caan a si. Cun hi zawtnak kong ah mipi ralrin a rak petu Dr. Ai Fen kong zongah soisel a hlawh ngaingai.

GitHub timi software a ṭhancho tertu le hi software hmang in mipi a bawmchantu Chen Mei, Cai Wei le a nungak Tang hna cu kan hnu April 19 ah khan an tlau tiah Chen unaupa Chen Kun nih a chim. Hi bantuk in pumpeek in mipi caah rianṭuantu hna nih an dirhmi Terminus2049 timi in ca an chuahmi paoh cu Mainland thawngzamh vialte le China social media he ai pehtlaimi phun paoh ah cun blocked le removed dih an si tiah an chim chih.

Pumpeek in rianṭuantu Cai le Tang hna cu i siiknak le mi thin a phok khomi rian nan ṭuan tiah an ti hna i an cawlcangh vialte hmuhkhawhnak “residential surveillance at a designated location” ah Beijing Chaoyang District police nih an chiah hna tiah an chungkhar hna nih AFP sin ah an chim. Chen Kun nih a chimmi cu ka naupa chuahnak kong ah cun Chaoyang police pawl biakhiahnak kan hngak ko tiah a chim.

Cai le Tang hna an tlau hi Chen Mei a tlau caan he ai khat tiah Chen nih AFP sin ah a chim chih. Chen le Cai hna hi Terminus2049 project ah rian a ṭuanmi an si. Hi bantuk in an tlau hi an rian ṭuanmi he ai pehtlai ko lai tiah kan ruah. Hi online in rian an ṭuanmi ah hin coronavirus kong ah a biapi ngaingaimi le theih a phu ngaingaimi thil pawl an chuah tawn hna.

Coronavirus kong he pehtlai in Wuhan khuami pumpaak sin in an theihmi kong hna an thanh tawn. Cun a biapi ngaingaimi pakhat cu hi coronavirus kong ah mipi ralrin a rak pe hmasa biktu Wohan Central Hospital doctor Ai Fen interview an tuahnak te hna an thlah tawn tiah an chim. Ref: Mizzima