By Salai Lairamthang||05|29 Biangreithlep|2020|| US Nih Tuluk Dantat Lai. Tuluk ram in US ah sianginn a kaimi lak ah micheu khat cu Tuluk communist ralkap pawl he an pehtlai mi siangngakchia tampi an um ti a si. Mah pawl nih cun Tuluk cozah caah a thli tein US cozah ngiatthlainak an tuah lawng si loin information tampi an fir i Tuluk cozah an pek lengmang ti a si. Mah bantuk siangngakchia pawl cu atu hi biatak tein an chek lio hna a si i, Tuluk cozah le Tuluk ralkap he a pehtlaimi siangngakchia paohpoah cu student visa pek ciami vialte kan hnon dih lai tiah US ramdang lei vuanci Mike Pompeo nih nizan ah a chim.

New York Time nih nizan ah Mike Pompeo le President Donald Trump cu mah kong ceihhmainak an ngei tiah a tial. US ah hin Tuluk ram in siangngakchia minung 360000 renglo sianginn an kai, mah chungah Tuluk ralkap he a pehtliami minung 3000 hrawng um dawh an si. The F.B.I. le the Justice Department zong nih US universities pawl cu Tuluk siangngakchia pawl i ralrin ding in nawl a pek hna.

Mah dantat nak hi Coronavirus ruang lawngah si loin Tuluk cozah nih Hong Kong ah national security legislation timi phungthar an ser i, Tuluk cozah le ralkap nih Hong Kong ah an duhning in nawlngiehnak an hman khawh cang lai caah atu bantuk in US nih dantatnak a tuahmi a si.