Atu lio zawtnak ṭihnung taktak a simi Coronavirus ruangah China ram ah a ummi kawlrammi harnak an tong phah. Naite a tlungmi zong an um i cheukhat rianṭuan in a ummi cu tlung kho loin an um i vansang au in an um. Mask a kai lawng si loin thil man a kai tuk tiah theih a si i ti le rawl kongah lungrethei in an um. An rianṭuannak an pu le nih ni hlawh an pe kho hna lo. Cucaah thlacamnak in bawm hna u sih.

China ram ummi Chin nute nih aṭialmi cu ” China ram caah thlacamnak in kan bawm ula. China pawl cu an sual ruangah Pathian nih hremnak a pek. Sahring an ei ruangah hiti bantukin an tuar i mawtchiat lennak in thlacamnak in bawm deuh hna u sih. China ah hmaihuh (mask) man a kai thawk in thil man zong kai ve. Duhning in ei le din cawk ding a um lo. A um chunmi zong a man faak tuk. Rianṭuan an phih dih i chuah vak kho loin an um.

Cu ti a si ruangah kannih china ah ummi le company i rianṭuanmi nih kan tuar ve lai. Kan pi le pu hna nih rianṭuan khawh loin inn ah an um. An ṭuancia an ei i kannih zong kan ṭuanman nihlawh pek kan hau fawn. Thilri man le a let in a kai. Duhning in thil cawk ding a um lo. Hi zawtnak a tlau lo cun kan ramah an kirter lai. Hlawh pek ding an ngei ti lo. Lampawngah palik nih ID an chek lengmang fawn. Kan cah khua phak khawhnak ding a um lo ti tluk khi a si. Nitin mthi an um i dam lo zong an karh chin lengmang.Vanlei hoih an hrum an ai. China lawng si loin ram tampi ah hi zawtnak hi a phan cang. Thawngpang ṭha theih ding a um lo i thawngchia lawngte nitin theih le hngalh a si.

China ram ah a ummi Kawlram mi kan luat khawhnak ding caah le zawtnak hrik thahnak si an hmuh khawhnak hnga thlacamnak kan bawm hram uh. Thil an ei lio video lawng share piak le Khrihfa mi hna an hrem ruangah ti i rak mawhchiat loin Pathian nung sinah thlacamnak in kan bawm deuh ulaw,” tiah aṭial.

Nungk pakhat nih aṭial vemi cu ” Zeitik tiang dah inn chungah kan i khumh rih ko lai. A har hringhran ko. Tlun le tlun khawh lo, leng chuah le a ngah fawn lo inn chungah thawngpang chia lawngte theih in caan kan hmang. Thlacamnak in kan bawm hram u law,” tiah a tar ve.

China ram ummi mipi hna cu hi an ram chungin a chuakmi zawtnak sii an hmuh khawh hlan lo cu vansang au in an um hna i leng zong chuah khawh lo in innchung lawngte an i arh hna. Hi zawtnak nih hin le a karh chin lengmang fawn i ramkip a phan cang. Cucaah i ralrin ngaingai kan herh cang hna.

Note: Hmathlak kan tarmi hi Google kan lak chinmi a si i amah ai remnak bikin kan rak tarmi a si i ca kan tar chihmi tu khi cu Chinnu/Lainu pawl nih  an ṭialmi a si.