Coronavirus aa thawk ningcang kong he pehtlai in hlathlainak tuah ding timi cu China President
Xi Jinping zong nih World Health Assembly hmai ah a chim cang, a si nain Coronavirus
zawtnak nan control khawh dih hnu lawng ah hlatlainak cu nan tuah ve lai ti ah biakamnak a ser
ter ve hna.

World Health Assembly ah aa tel mi vawleipi hruaitu dihlak hmai ah China President Xi Jinping
nih ” China Cozah cu zeitin paoh ah open tein kan um peng. A dik mi a fiang mi le thildik a
dirkamh mi kan si lawng si loin thil pakhat a cang sual mi cung zong ah ttuanvo lak ngamnak
thinlung a ngei mi kan si” tiah a chim hi asi.

Coronavirus zawtnak ruang ah World Health Assembly timi vawleicung hruaitu tonnak cu
online in tuah a si i tutan hi vawlei tuanbia ah a voikhat nak bik World Health Assembly online
in an tuahnak zong a si.

Coronavirus hi China in a chuak mi a si timi lunghrinhnak cu Australia, US ti mi nih an chim
lawng si loin hlathlainak tuah a herh tiah voi tampi an au. Australia Cozah nih hlathlainak tuah
ding timi biatung a chuah pi mi zong nihin ah ram tampi nih an dirkamh. Cu hnu ah China
President nih tu bantuk in bia a chim ve hi asi.

“China cu zeitik paoh ah thildik a dirpi, a tuah sualmi ruang ah tuanvo lak ngamnak zong a ngei.
Tutan thil kong zong ah WHO he aa caan hman tein information share nak kan tuah colh.
Hlathlainak tuah ding timi cu ka pom, ka cohlan a si nain vawleipi dirhmun in Covid-19
zawtnak hi control a si ko cang timi boruak a chuah tik lawng ah nan rak tuah ve lai” tiah a chim
hi asi. Ref: Free Malaysia Today News (Laikokekjournal)