A ralaimi Sikpar 08|11|2020 thimnak ah Chin state um MP hmun 39 cu party 12 le Independent (pumpak) in minung 212 an i cuh lai tiah kan theih.

Chin State Thimnak Zung rianṭuantu U Lin Kyaw nih, “party 12 an i cuh lai. MP cuh dingin minung 212 nih min an pemi. Independent (pumpak) in aa cuh ding hna hi minung 17 an si. An dihlak chungah nu 18 an i tel,” tiah a chim.

“Chin state ah vote a thla khomi hi minung ting 3 le thong 40 (340,000) leng an um. Chiapa 25|07|2020 thokin vote a thla khomi min cazin taar hram kan thok. A hmasa bik kan tarmi min cazin ning ah minung 340,000 leng an um,” Chin State Thimnak Zung rianṭuantu U Lin Kyaw nih cun a chim.

A ralaimi Sikpar 08|11|2020 thimnak ah Chin state ah pumtlamtlinglo vote a thla khomi dihlak in 3,000 fai an um. Thlanglei Laitlang ral a thawhnak (conflict zone) Paletwa peng zongah mipi nih vote an thlak khawh ve nakhnga state thimnak zung nih a timhtuah cuahmah, tiah kan theih. Charhchan: Chin Wold