Chin ram Paletwa peng Kadu khua ah April 2 ah bom ai lamh sualmi Pu Pyi Tin cu Manladay sii inn ah thlop ding ah ke in a kal i Sami, Matupi an phak ah a keh lei mit a maw i khua a hmu ti loh ti thawng kan theih.

Chin ram Paletwa peng chungah kawl ralkap le AA hriamtlaibu an i tuknak ruang ah khuami hna lo an kalnak le mehhang an kawlnak ah bom an chiahmi an i lamh ruang ah a thimi le ai hliammi an tlawm ti lo. Chin ram Paletwa peng i ummi mipi hna humhimnak thinphang a si. Mipi hna nih khual an tlawn tik ah an humhim khawh deuhnak ding caah cozah lei in fak deuh in țan rak kan lak piak ding in an duh. Chirhchan:Khumiland News

Thawngpang dang rak rel chih: Coronavirus Italy Ah A Tamtuknak Hi Lockdown An Tuah A Tlai Tuk Caah A Si: Allison McCann, Nadja Popovich le Jin Wu nih 5 April 2020 ah an chimning in Italy nih coronavirus hi zei ah an rak rello caah vawleicung ram ah lockdown a tuah a tlaibik pakhat an si. February 20 ah khan kum 38 a simi mipa ah hi zawtnak hi rak hmuh hmasat bik a si. A mah hi Italy ram chaklei kam ramtthen Lodi ah a ummi a si. A langhning ah cun hi zawtnak in a zawmi midang hna zong hi amah he ai pehtlaimi si dawh in an lang.

A nihnihnak ah Italy nih coronavirus in a thi hmasa bimi hi Veneto ramtthen ah a si. A nilinak ah a cozah nih Padua ramtthen Lodi le a pawngkam khuapi 10 hna cu “red zones” ah a chiah hna. Hi chung ah minung 50,000 hna cu a dangte in a chiah hna. Italy chaklei kam hna ah sianginn, museum, theater pawl biaknak he ai pehtlaimi i pumhkhawmhnak le lentecelhnak hna cu khaar an hung si. Cafe le bar pawl hna cu zanlei suimilam 6 tiang an hun ter hna.

Niruknak ah Italy chawlehthalnak hmun cheukhat hna an hung tlak tik ah a duh lomi tampi an um. Milan campaign cu ngollo in lian pipi in tuah a si i bar pawl hna zong zanlei tiang hun ter an si. Ni 12 nak ah Milan’s pennak chung biakinn ngan pipi hna cu khualtlung tiang in tlunter an si. Khuapi chung museums cheukhat pawl hna zong an hun tthan hna. Coronavirus zong a hung karh ching thluahmah ve i ramchung ah minung 2000 bak an hung phan manh.

Ni 18 nak ah cun a cozah nih chaklei kam ramtthen cu March 8 thok in biatak deuh in an van phihkhar cang. Hi an phihkhatnak kulhchung ah hin minung 16 million hrawng an um. A sinain tuandeuh ah order an chuahmi a fehfuanlo caah mi cheukhat hna nih cun an rak chuahtaak manh cang. Coronavirus an hmuh hmasa bik in a ni 20 nak March 10 ah Prime Minister nih ram pumpi ah a herh huaha lomi cawlcanghnak paoh cu a van phih. A sinain lockdown ngaingai cu a si hlei rih lo.

A ni 22-23 nak ceo ah bar, restaurant le chawdawt pawl hna cu khar an hung si. Factorie pawl tu nih cun a herhtuk lem lomi pawl cu an chuah tthiamtthiam ko rih. Park le lenglei cawlcanghnak vialte hna tu cu khar an si. Ramchung ah nichiar in new cases an um lengmang caah ni 24 nak ah cun April 3 tiang lockdown ding in thanh a hung si.

Hi coronavirus in Italy ramchung ah a zawmi hna hi minung 124,000 renglo an hung phan cang. Cu lawng silo in hi zawtnak ruang ah minung 15,000 renglo nih an thihpi cang i vawleicung ah hi zawtnak a tam biknak le a thimi an tam biknak ram pakhat ah ai chuah. A tu tiang in donglo in ramchung ah hi zawtnak hi a karh peng ko rih.

Scientists cheukhat pawl nih an chimmi cu hi virus hi zei huaha ah an rak rel lo. Cu caah virus ramchung ah a luh hi cu a hung tlai ngai ko nain rangtuk in ramchung ah a karh hi a si. A tu ah cun hmunkip ah a karh cang tiah Roberto Burioni nih a chim. Ref: The New York Times