Pumtlinglo hna nih thil biapi phun 4 an hal mi Chin Ramkulh Cozah nih a hnon. Kalaymyo hrambunh Disability Development Initiative (DDI) nih 2018 kum ah Chin Ramkulh Cozah sin ah an riantuannak he pehtlai in thil biapi phun 4 an hal hna i nihin tiang ruahpiak an si lo, tiah tuanvo ngeitu sin in January 30 ah kan theih.

Hi thil biapi phun 4 an hal mi hna cu; Myanmar ram nih a ngeih mi Pumtlinglo hna upadi ning in Chin Ramkulh Cozah nih Pumtlinglo hna Nuhrin Covo tlamtlinter ding, Pumtlinglo ngakchia sianginn kai khawhnak, Pumtlinglo hna pum pawcawmnak ruahpiak ding, le 2018-2019 tangka kum ah budget kan suaipiak ve u, tiin Chin Ramkulh Cozah sin ah an hal nain nihin tiang ah Cozah cawlcanghnak pakhat hmanh a lang rih lo, tiah kan theih.

“Hi kong ah Chin Ramkulh Cozah tuanvo ngeitu upa zong kan ton hna. Chin Ramkulh Cozah lawng si loin Hluttaw zong ah kan ceih lai, an ti nain nihin tiang an kan ruahpiak lo. Cozah nih riantuan ding tampi a ngeih mi lak ah pumtlinglo hna kong hi an kan tenhpiak lo. Ramkulh Cozah nih budget kan ngei lo, an ti. Chin Ramkulh Cozah nih pumtlinglo hna he pehtlai in rian an kan tuanpiak mi pakhat hmanh a um rih lo,” tiah DDI in Deputy Director Mr. Joshua nih The Hakha Post ah a chim. Credit: The Hakha Post