Chin Ralzaam Kongah India Cozah Nih Fiang Tein A Chim Cang

Chin News

India Union Home Minister Nih Myanmar Ram Daih Hlan Ah Ralzam Kirter An Si Lai Lo Tiah Lalduhoma A Chimh. Mizoram Chief Minister Pu Lalduhoma cu India Prime Minister le Union Ministers hna ton ah Delhi khuapi ah a tlawng i, nizan January 4 ah Prime Minister Naredra Modi a ton hnu ah Union Home Minister Amit Shah a ton ṭhan.

Union Home Minister Amit Shah nih Myanmar ram buai lio ah ralzam hna kirter an timh lo kong Pu Lalduhom cu a chimh. Union Home Minister Amit Shah nih cun India ramchung i a ummi ramdangmi vialte an finger print(kutneh hmanthlak) laak cu India cozah pi hmaithlak mi a si kong a chim i, atu i Myanmar mi a ummi hna kongkau ah, “Myanmar ram a ṭhat hlan lo cu ralzam hi kirter an si lai lo ti Mizoram mizapi nih rak kan theihpi sehlaw ka duh,” tiah Myanmar ralzam kirter colh an timhlonak kong cu Mizoram Chief Minister hi a chimh.

Home Minister nih Myanmar ralzam kong a chim mi he pehtlai in, a herh mi tete pehzulh ding in Union Home Secretary Ajay Kumar Bhalla cu biaruahnak a ngeihpi colh kong Pu Lalduhoma nih cun amah social media ah a taar. 2021 ah SAC nih nawlngeihnak an laak hnu in Myanmar ram cu a buai i India ram ah ralzam dirhmun in mi tampi an lut. A bik in Chinram he ramri kaupi aa hrawm mi Mizoram ramkulh ah ralzam 40,000 an um i, Myanmar ralzam kong ah Central cozah nih ralzam cohlan lonak a rak thanh bal.

Mizoram cozah tlaitu hmasa MNF ministry nih fektein ralzam a dirkamh bantuk in atu cozah tlaitu ZPM party zong nih a pehzulh ṭhiamṭhiam. ZPM leader le Chief Minister Lalduhoma nih cun Chin ralzam hna hi kan unau an si bantuk in dawtnak he kan zohkhenh hna lai i, minung hawi cung zawnruahnak he zong kan zohkhenh hna lai, tiah a chim. Ref: The Chin Post

Leave a Reply