Chin Pastor pakhat nih a tuarnak (Testimony) kong a chimmi: Kum 1982, kum(6) hrawng ka si lio ah hin Khrihfa kan si ruangah kan inn hi Lungtum in an rak cheh bal cang. Kum 1994, Kum (18) ka si ah Pathian thawngṭha bia ka rak aupi ruangah tlaih ka tong i lam laicer khuabawi inn hren ka tuar i ka ningzah ka celh loh.

Kum 2004, kum 28 ka si ah Pathian thawngṭha bia ka aupi ruang ah an ka tlaih ṭhan i thonginn (Lock-up) ah an ka hren. Cu caan ah cun ka thilri an ka phoih ter dih ka kedanh tiang an ka phoihter dih i, a thaizing ah thongin thilpuan he cun Insein Biaceihnak zungpi ah an ka phakpi. Insein Biaceih zung ah cun thongtlathil thuam le ka kut cikcin khih buin, mi zahpi hmai i hruai ka si tikah ka ning a zah tuk hleiah ka ngaihchia tuk hringhran.

Kum 2007, kum 31 ka si ah inn pakhat ah Home Crusade ka tuah i cu lio ahcun zum lotu nih Lungtum in an rak ka den ṭhan rih. Kum 2013 Kum 37 ka si ah a dik lomi sual phawtnak ruangah Thla 7 chung ah voi 9 bak te Biaceih zung ah chuahpi ka tong ṭhan. Kanun Lamthluan ka sining ka cuanh ṭhan tikah hmaihngalpi ding ka ngeih chun cu Jesuh Khrih thawngṭha aupi ruangah faknak ka tuar mi lawng hi a si.

A ngaingai ahcun Pathian riantuan ruang ah kan tuar mi vuaknak, a diklomi sual puhnak, kan kut cikcin in an kan khihmi, thongthlaknak kan tonmi thil hna hi Pathian chimhhrinnak aa tel ruang
zong ah a si kho men. Asinain a biapi bikmi cu tuar kan duh tiin temtuar khawh menmen mi thil
an si hlei lo. Jesuh temtuarnak i hrawm chih in hmailei karhlannak ah fek tein kan dir khawhnak hnga le kan nun kan iremhnak ding caaha si tiah keimah nih cun ka cohlan. Hibantuk thil ka temhtuar nak vialte cungah ka lung di a riam ko. Bawipa kaa lawm. Pathian rianṭuan ruangah temtuar a ingtu vialte Pathian salṭha dihlak upat kan pek dih hna.

Pastor Dam Suan Thang hi Pathian thawngṭha a aupi ruang ah fahnak phunkip le temhtuarnak a phunphun a ing tuarmi a si. A tu a hngawng ah hliamhma a ummi zong hi Pathian bia chim kho hlah seh tiah hramhram in a hngawng an ah piak mi a si. Asinain Satan nih a ka tei lo, hremnak in ka luat lawng si loin ka aw zong a chuak ṭhan i Pathian thawngṭha cu ka chim khawh rih ko tiah a chim fawn.

Pastor Dam Suan Thang hi Yangon ah Pathian rianṭuan in a ummi a si. Hibantukin amah thawngṭha bia aupi ruangah hrem a tongmi Pastor Dam Suan Thang zong Pathian kilven in thawngṭha bia a aupi nak ah umpi ko seh! Hi a konglam hi amah nih a chimmi a si i amah siannak in kan thlahmi a si. chirhchan: C-Ministry