ONE MORE NIGHT WITH THE FROGS- (Utlak He Zankhat Te Um rih Ko Hna Usih)

“2020 Cu Chin Party Vote Caan a Cu rih loh NLD Vote Ding Asi” ti ruahnak hi ” One More Night with The Frogs”he aa lo. Exodus 8:10″Thai Zing Ah”: Pharoh nih Aaron le Moses kha a auh hna i Izipram in Utlak kha thiangh piak dingin a nawl hna.”Zei tik ah dah Utlak cu kan thianh lai”tiah an hal tik ah Pharoh nih cun”Thaizing ah”thiangh ko uh a ti hna.
(How Stupid Answer).

Pharoh nih “Atu ah (NOW)”thiangh uh a ti awk asi ko. Thaizing ah a ti mi a sullam cu…”Tu zan te cu Utlak he um tti rih ko usih…khuasa tti rih ko usih”ti nak asi.(One more night with the frogs) Atu tan 2020 election cu NLD vote rih ko usih Chin Party Vote Caan a si rih lo”tiah a ruat tu poh cu”UTLAK he Term khat te khuasa rih ko usih”ti nak asi.

Chin ramkulh Cozah ah Utlak (FGROS) i cawh a herh lo. A buai thlak. Hna an hnok.
#No more term with the Frogs# Frogs(Utlak). Chin For Chin. Credit: Jacob Thang

Nunnak Biatak: A Kan Hruaitu Hna Mipi Nih Bawmh le Dirkamh Hi Kan Miphun Nih Teinak Hmuhnak A Si!

Moses cu a ban tha kha a dit tikah Aaron le Hur nih khan lung pakhat an lak i a cungah cun an tthutter i annih nih khattelei veve in an dirkamh i a ban cu an doh hna. Ni a tlak tiang a ban cu an doh hna i Joshua nih cun Amalek mi cu a tei dih cikcek hna hna. Exodus 17: 12-13

Khrihfa nih kan ngeihmi Baibal Cahlun hi hruainak phungphai mit in hei cuanh tik ah nihin kan i hruainak zong ah zohchunh ding le i cawn ding awktlak thil tampi a um tihi hmuh khawh a si. Hruainak ka titik ah biaknak lei lawng siloin miphun pakhat nih a lamkip in kan tthancho khawhnak ding caah kan herhmi ramkhel rianttuannak le a dangdang rianttuannak caah aherhmi hruainak hna zong kha chim duhmi cu a si. Pathian nih a thimmi hna Israel miphun caah hruaitu a pek zungzal hna. Cu nih a langhtermi cu Pathian hi a fale minung hna hmang in a sunparnak langhter a duh caah a si.

A luanciami 1996 hlan i kan Chin miphun tuanbia kan zoh tik ah hruaitu ttha nih mipi tampi a rak kan sersiam i mipi chung zong in hruaitu thar hna zong tampi a rak chuahter hna. Cu nih a langhtermi cu hruaimi mipi nih hruaitu ttha ngeih kan herh tinak a si. Nihin kan dirhmun zoh tik ah thil tampi aa thlengmi hmuh khawh a si. Atu ahcun mipi siloah hruaimi hna nih hruaitu ttha tampi a chuah ter ve hna timi kan hmuh. Cu caah hruaitu ttha kan ngeih khawhnak ding caah hruaimi mipi zong hi kan rak biapi tuk ve leng ah ttuanvo nganpi zong kan ngei ve ti nak a si.

Pathian nih Moses hmangin a thimmi Israel miphun cu sal an cannak Izipt ram chungin a chuah hna. “.. BAWIPA nih nawl a pek hna bangin riahhmun pakhat hnu pakhat an i thawn. Refidim ah khan an riak, asinain din awk ti a um lo” (Exodus 17:2). Din-ti a umlo tik ah mipi nih cun Moses cu ziahawh i sual a phawt. “ Zeicahdah Izipt ram khan na kan chuahpi? Kanmah he kan fale he kan sattil he ti haal in thah awkah maw na ka chuahpi? an ti” (Exodus 17:3). Cutikah Moses nih cun Pathian sinah thla a cam i Pathian Horeb tlang lungpi chung in din-ti cu a pek hna.

Cu tlawmpal ah cun, an i dinhnak Refidim ah Amelek mi cu an ra i Israel mi cu an rak doh hna. Cutik ah Pathian thimmi hruaitu Moese nih cun Joshua kha a thawh i “Mi tlawmpal in i hril hna law thaizing ah Amalek mi kha va do hna u. Kei tu cu tlangpar ah khan kan dir lai i Pathian nih a ka pekmi tthiangtthunh kha ka hler lai, a ti” (Exodus 17:9). Moses nih rian a pek i a fial bang khan Joshua nih cun aa hril mi ralkap hna he cun Amalek mi cu an doh hna.

Moses cu a chim bangin Pathian sin ah thlacam dingin tlangpar ah a kai. Aaron le Hur nih cun a hnu lei in an zulh. Moses nih a ban a thlir chung paoh cun Israel mi nih an tei hna. Sihmanhsehlaw, Moses zong cu minung a si ve caah a ba ve. Dir in a ban cu a thlir kho cawk ve lo. Cutikah a zultu Aaron le Hur nih cun lung pakhat an lak piak i a cungah cun a tthut ter. Cu lengah, Aaron le Hur nih cun khattelei veve in an dirkamh i a ban cu an doh. Cuticun Joshua le a ralkap nih cun Amalek mi cu an tei dih cikcek hna.

A cunglei langhtermi ah hin zumtu nang le kei nih kan i hruainak ah biapi ngai in kan i nunpi dingmi thil hna an um. Moses cu hruaitu a si bantukin hruaitu dirhmun le ttuanvo kha a hngalh. Cu bantukin a hruaimi mipi hna zong kha anmah le an ti khawhmi thil cio kha a theih i cu ning cun rian a pek hna. Hruaimi zong nih an hruaitu Moses nih fialmi rian cu nawlngeihnak he felfia tein an ttuan ve. Hruaitu Moses a tha a dih tik zongah hruaimi Aaron le Hur nih a ttuanvo pei a si cu tiah an ti lo. A tthut nak dingah lung an lak piak. Cu lawng cu siloin a ba cangmi Moses ban cu khattelei veve in an doh piak rih. Cuti i Aaron le Hur nih an hruaitu Moses cu an bawmh i an dirkamh tik ah Israel mi nih Amalek mi hna cu an tei hna.

Kannih Chin miphun hruaimi mipi zong nih a kan hruaitu hna cu cubantukin kan bawmh hna i kan dirkamh ve hna a siahcun kan biakmi Pathian nih teinak a kan pek hrimhrim ve ko lai. Kan Chin miphun caah Pathian nih a kan pekmi a kan hruaitu hna a bawm kho mi le a dirkamh kho mi kan si khawhnak lai Pathian nih thluachuahnak kan pe hram seh. Ref: Danny Bawi Thianhlun