Chin Party Nih Hakha Ah Head Quarter Nan Chiah Lomi Cu Nupi Tthit Ttung I Vok Thah Lo He Aa Khat

Theihtlei

Laimi kan pa pakhat a si ve mi Pu Ngun Maung comment ah bia ka lehnak hi i hrawm hna usih. A mah țialmi zong tling tein rel nan duh ahcun CNLD lutlai tiah hi group ah khan search u law comment pawl nan hmuh lai i cu ahcun a um ko lai. Party kong kau hi cu zapi i hrawm le i ruah ti ahhin thil tha a chuak duhmi a si. Ka lehnak cu a tanglei hi a si.

Ngun Maung ka pu nangmah pumpak nih lungsau tein na ka lehmi ah kaa lawm tuk. Kan upat bakmi le kan uar bakmi na rak si. CNLD lubik si te seh tiah saduh ka rak in that piak ve. Pumrua mui hmai zong nih a chit cem mi na si. Nain toidor nun tein naa cuh lem lo. Kan thang țhat thiamthiam. Nain Hakha fa kan si ve nak in phang lo awk a tha lomi tampi a um.

Image result for chin party"

Capital țial ding ahcun ka phang lem lo. A ho hmanh nih an țhial khawh lai zong ka zum lo. Nain a dang tampi ah phan awk a um. Nan Baho lei zong nih an fian awk a si ko ah ka ruah. Chim ahcun tampi chim ding a um ko. Ka ca chung i ka țialmi ah khin a lang ngai cang ko. Hi hi Hakha mipi nih kan hngalh lo a si hrim lo. A hngal ve hrim lomi zong an um ko lai. Nain CNLD nih Hakha kong ah an lungput an thlen lo ahcun Hakha mipi vialte nih Hakha caah zei dah a chuak khomi a si ti cu fianter ka rian a si te lai.

CNLD palai pawl nih hin Hakha Chin State Capital a sinak hi aa tlak ning in upat loin Peng pakhat bantuk men in a upatmi hi a za lo. Chinmi vialte caah Capital a sinak rup in an upat a herh. Cu cu Head Quarter chiahnak thawng in a lang bik. Budget kong na chimmi vialte kha nan mawh ve lo ka ti ko. Nan mah cio zong duh ahcun NLD le USDP zong ah lut kho nan si ko lai nain Lairam nan dawt tuk ruangah Lai party hrimhrim nan i thim tiah mipi zong nih kan in hmuh ko hna.

Image result for chin party"

Nain kei ka hmuhnak ahcun Party dirh ve ko ahcun Head Quarter cu Hakha ah chiah nge nge ding kha cu a rak i telmi a si. Nupi țhit vek vek ko ahcun Vok,Caw te tal thah lo cu zoh chia tuk a si. Party dirh ve ko i Hakha zung pi bik chiah lo cu nupi țhit ve ko tung i arsanpioh te he lawng lawmh bantuk a lo. Cu nih cun sifahharsatnak nakin țhit umnak a upat lo tu kha a langhter. Cubantuk thiamthiam cun Hakha ah chiah lonak nih a langhtermi cu budget har nakin Hakha Chin State Capital a sinak an upat lo kha a langhter deuh.

Comment pawl khi na rel ahcun na hmuh ko lai. Chia nawn in a van ka commentmi khi Falam lei lawng te an si dih. An saduhthah pei a rak si cu. Capital covo le peng town covo zat hi pei tlukruan ah an ruah cu. Capital nih cun a tam deuh awk hrim a si ko timi an cohlang duh lo khi. Head Office chiah zong kha a herhnak an i hmuhter duh lo…kha kha nan mah party lutlai pawl nih Common sense hmang bu tein Hakha rak upat ahcun a zor lai.

Atu ahcun CNLD lutlai pawl nih Hakha mipi nih zei tin an kan ruah lai ti tuak bak loin hakha mifa chung in lutlai an lak lo pin ah Head Office chiah te zong an i theih ter duh lo. Budget puh kha cu mipi co hlan awk ah a har tuk…zaangfahnak tein CNLD lutlai pawl kha rak ceihpi tawn ko hna. Nan mah cu aa kom le aa hngal nan si hna lai i pakhat nih Rangoon ah a tlam a tling deuh a ti zong ah nan amen cio ko lai nain Hakha mipi sawhsawh kan si ve nak in kha bantuk kha cu thlanglamh ah kan rel. Credit: Mang Lian

Leave a Reply