Sagaing ramṭhen Kalay peng Biazeihzung nih kumtlinglo ngakchia sualpi kong he pehtlai in kum (43) chung thong an thlakmi Evan. Lal Biak Lar @Lar Boih cu Biaceihzung nih kum (17) chung thongtla dingin kum an sawh (ṭhumhpiak) piak ruangah Kalay hrambunh zatlang phu nih dohkalhnak (duh lonak) tuah an timh tiah kan theih.

Kalay khuapi nitlak lei Letpanchaung khua ah a ummi Evan. Lal Biak Lar @ Lar Boih cu kum 14 le kum 15 mi kumtlinglo ngakchia pahnih sualpi ruangah Kalay Biaceihzung nih a luancia kum 2019 Tangkhawng 16 ah kum 43 chung thongtla dingin biakhiah piaknak an rak tuah piak.

Cu biakhiahnak an tuah piakmi kong he pehtlai in Evan. Lal Biak Lar @Lar Boih i a sihni nih cun Biaceihzung ah zaangfahnak nawlnak (ngaihthiam halnak) an tuah hnuah kum 43 thongthlak ding timi cu kum 17 ah ṭhumhpiak (sawh piak) a si ruangah Kalay khuapi zatlang phu dirhmun (ramchungmi/Civil mipi) phu nih duh lonak (dohkalhnak) langhter a si lai tiah Kalay khuapi hrambunh Upper Chindwin Youth Network i rianṭuantu Ko Kyaw Thet Win nih a chim.

“Kalay peng Biaceihzung nih kumtlinglo nu ngakchia pahnih tlaihhremtu (sualpi)cu kum (43) thongthlak a si. Biaceih zung nih zaangfah nawlnak an tuak tikah kum (17) lawng tla dingin an ṭhumhpiak (sawh piak) hihi kan cohlang kho lo hrimhrim. Zaangfahnak nawlnak an tuah ruangah Naypyitaw lei nih tlaihhrem a tongmi nu ngakchia pahnih cu an auh hna.

“Cu ruangah kannih zatlang phu le nu phu nih hi kong he petlai in ramṭhan Biaceih zung ah kum an sawh piakmi kan cohlang lonak le hi kong cu ruah piak ṭhan ding le Kalay Biaceih zung nih kum (43) tla dingin biakhiahnak an tuah piakmi cu namhnehnak an tuah piak nak hnga upadi ning tein kan tuah lai.

“Zei bantuk dirhmun in dah kan dohkalh lai timi pawl cu tuni Kalay peng upadi lei ruahnak petu bu (committe) le nu bu (committe), kanmah dirhmi phu, sualpi a tongmi ngakchia pahnih hna he hmunkhatte ah caihhmaiṭinak kan ngei,” tiah Ko Kyaw Thet Win nih cun a chim.

“Kumtlinglo sualpi kongah atu bantukin hremnak an ṭhumh (sawh)piak an timi cu ruah lengmang tikah zeiti lei hmanh in cohlan khawhnak ding lam a um lo. Cun, kamkhat leiin an chim lengmangmi cu tangka phaisa duh ruangah hitihin an tuah an timi zong kan cohlang lo,” tiah Pi Ma Sawm nih a chim ve.

Hi tlaihhremnak kongah Kalay khuapi hrambunh a simi Dingdi phu, Women For Justice, Upper Chindwin Youth Network pawl hna ṭhihruainak in duh lonak langhter a si lai tiah kan theih. Evan. Lal Biak Lar @Lar Boih cu Kalay Biaceih zung nih Yazatetgyi pukmah 376, 323, 506, 3476/511 hna hmangin kum (43) chung thongthlak dingin biakhiahnak an rak tuah piakmi a si. Charhchan: Khonumthung

Note: Kawlca, Laica in kan leh chinmi a si caah kan leh palhmi tete a um kho mi a si. Cucaah careltu nih na kan theihthiamnak lai kan nawl duh hna. Hmanthlak kan taarmi hi Thechinexpress ta kan lakchinmi a si.