AA ral-hrang ruangah kan ram le mipi nih kan tuar cuahmah. March (14-15) ni 2 chungah minung 21 kan thi (CHRO). Paletwa peng in minung 2,000 tluk nih inn le lo, khua an chuah tak cang. AA nih kan ram ah hmunhma an khuar i a kan pawnchuah cuahmah cang. Lung a fak ko.

Covid-19 pulrai ruangah ramchung ramleng harsatnak kan tong. India le Malaysia um kan unau hna eidin le innlo kongah vansang au an si. Kan miphun humhimnak, damnak, le daihnak fakpi in mit hmuh le hmuhlo ralsa nih thlichia bang a kan den.

 

A tu lio bantuk caan ah Chinmi zeidah kan tuah lai? Hi biahalnak hi Chinmi dihlak caah (challenging) ngan taktak asi. Keimah himnak le damnak lawng a za maw? Kan chungkhar, khua, Khrihfabu, pengtlang, party tthatnak nih kan miphun le ram a damter kho lai maw? No.

A tu lio bantuk harsatnak caan ah Chinmi dihlak kan lungrual le ttantti a herh taktak. Kan Chin cozah, CNF, Political Party hna, le Biaknak le Community hruaitu hna, civil society group hna, kan mifim hna tiah dihlak in ramchung ramleng kan ttan tti a herh tuk caan asi. Kan miphun hruaitu upa hna lungkhat thinkhat in miphun humhimnak le damnak caah nan fimnak le thazaang dihlak chuah in i zuam aherh lio caan asi.

Mipi zong nih kan ram le miphun damnak le humhimnak caah ttuanvo nganpi kan ngei ve. Kan cozah le hruaitu upa hna khuakhannak kha kan ngeih le dirkamh hna aherh tuk lio caan asi ve. Pakhat le pakhat i soisel le chimzai caan asi lo. Ram nih harsatnak ton lio caan ah aa soiselmi le mah tthatnak a kawlmi ram hna an dirhmun khi kan hmuhmi asi ko.

Lung aa rual i cozah le mipi aa bawmmi ram hna nih himnak le teinak an hmuhning kan mithmuh asi ko. A daithlang mi hruaitu le aa lungrual lomi ram hna nih zei dirhmun dah an phanh ti cu tu lio Covid-19 vawlei boruak nih baisakup bang fiang tein a kan hmuhsak ko. Pathian a biami miphun kan si bantuk Chinram le miphun cu Pathian nih kan huhpheng in damnak le teinak kan pe ko sawh seh. Amah Pathian bochan buin i daw hna usih. Kan si khawh tawk in i bawm in i dirkamh hna usih.

Upatnak he,
Plato Van Rung Mang
April 03, 2020