Chin Cozah Hakha Inn A Hrawhmi le Inn Hmun Samhnak Kong Ah Lungchuak Bia

Hmuhning

Nizan Chinram cozah nih Hakha Inn lo a hrawhmi zoh ahcun zaang a raam ngaingai. Mipi zong phungning lo tukin thil an tuahmi a um ve caah si ttheo lai. Cozah lei pawl an ral a ttha ngaingai. A ruang cu mibu tampi, Laam tiang a zawhmi le minung 100 leng a simi a buu in a ummi hna cozah nih mah ti van hrawhpiak ngam kha an ral a ttha ngaingai ka ti. Cozah nih Tapung sakhan va lak bantuk ka hei lawhter. Hehehe…

A ruang cu kha mibu pawl nih ningcang loin thil an tuah sual lai ti kha video ka zoh ah ka thin kai domh ngaingai. A ruang cu mah inn le lo, mah ram le dum hrawhpiak cu Revolution tiang hna a chuak sual lai maw tiang phan awk a um. Hi bantuk ruangah revolution hi a chuahnak a si theo. Asinain, mipi hrawhpiak mi hna kha an ralchiat maw a si? Thil an theih lo bia maw a si? An tthat hrimhrim bia dek? Zeithil hmanh a cang lo i lomh a um tuk! Hmailei ah hi bantuk thil cu chuak hram ti hlah seh! Cozah nih inn lo le dum hau kong ah an tuah dingmi kha felte in tuah ve cang hna sehlaw a ttha tuk hnga.

Tuzing ah The Chinland Post nih an zamhmi ka rel. Cu ah an ttialmi cu hi hmun Acre 676 hi inn hmun in 712 a chuak. Cu 712 inn hmun a sang bik sing 50 in a niambik ting 10 in an zuar lai tiah a ttial. A zat hi tthum deuh kho hna sehlaw, mipi caah a ttha tuk hnga. Ka lung ah a chuak ngaimi cu Chin cozah nih Hakha hi khuapi ah ser an duh taktak i mipi an dawt taktak ko hna ahcun a tanglei bantuk in ri or phung ser hna sehlaw ti ka duh ngai. Hi inn hmun thar 712 a sok khotu ding dirhmun hi a tanglei bantuk in si hna sehlaw a ttha tuk hnga.

Pakhat nak ah Hakha ah inn hlang in a ummi, inn hmun a ngei lomi si hna seh.Cun khuate lei minung si hna seh. Hmeinu/pa kha biapi ah ruahpiak hna seh. Hi inn hmun a soktu ding hi Laimi si hna seh, miphun dang pek si hlah siseh.

Co hlan lo dingmi hna cu:
Hakha ah inn hmun a ngei cia mi paohpaoh cohlan lo ding. Cozah rianttuan Inn hmun a ngei cia pawl zong cohlan lo ding.A thli in ziknawhnak le a hlei in phaisa ipeknak cohlan lo ding.Inn hmun ngei cia mi nih a sok i a ngah zong ah theih tthan ahcun chuh ding. Hi a cunglei a tlangpi in kan langhter mi hi an zulh le zulh lo kong ah Chinram hrambunh nih an theih khawhnak hnga zei an tuahnak paoh ah thawnghlat khawhnak nawl pek ding. Hi inn hmun mi zei dah a ting i mi zei a tinglo ti bantuk mipi sinah thanhnak kan tuah kho hna seh. Hi kong tawlreltu paoh paoh nih ilak hna hlah seh. Sok ve fawn hna hlah seh. An ca ah a thiang lo.

Hi a cunglei kan langhter mi bantuk hi tawlreltu cozah lutlai nih an zulh lo i anmah nih an ilak i pumpak dang sinah an zuar chin a si ahcun zumh tlak lomi cozah an si hnga. Cu lawng si loin mah karkalak huih a duhmi an si hnga. Cu pin ah hrawhpiak a tongmi hna le mipi thinlung ah ngaihchiatnak a fak chinchin lai. Cucaah hrawhpiak cu an si cang ko i a tang rihmi inn hmun tawlrelnak le zuarnak kong thil dik le thil hman in a kal khawhnak hnga cozah lutlai an biapi tuk pin ah Chinram ah hram a bunhmi Media pawl zong an biapi tuk. Credit: Stalin Tha Cung Lian

Note: A cafang kan remhmi a um lo nain, a remhcan dingin remhmi cu a um.

Leave a Reply