The Chin Post: Malaysia Ah Hlei In A Zuangmi Pu Cholei Le A Fale Pahnih Ruak Cu Nihin August Ni 4 Ah An Vui Cang Hna. Malaysia ram Kuala Lumpur ah khua a sa mi Lunglei zawtnak a ngeimi Pu Cholei le a fale pahnih ruak cu nihin August ni 4 ah an vui hna, tiah theih a si.

Pu Cholei nih cun hlei cung in a fale pathum cu a nam hna hnu ah amah zong a zuang ve i, a fale pahnih le amah cu a hmun ah an thi colh i, pakhat tu cu a him nain a hliamhma fak ngai, tiah theih a si. Pu Cholei cu Malaysia a phak hnu in biaknak lei ah a pialsual mi a si, tiah an chim i, cupinah a biachim holhrel zong a felfai lo caah rianṭuan lo in an nu tu rian a ṭuan i amah nih inn lei ah ngakchia a umpi hna, tiah an chim. A nunnak a him rih mi a fapa hniangcem Vabiechopha cu a hliamhma a fah deuh caah Selayang sii-inn ah thlopbul a si.

Thawngpang dang: Japan Rammi Video Journalist Pakhat Cu Sualpuhnak Phun 2 In SAC Nih Taza An Cuai! Japan rammi video journalist le flim sertu pakhat cu sualpuhnak phun 2 in tazacuai a si, tiah SAC nih cathanh an chuah. Japan rammi video journalist le flim sertu Toru Kubota leng ah Yangon ramṭhen, South Dagon peng ah SAC ralkap uk duhlonak langhter in lamzawhnak a tuahtu minung 2 cu SAC ralkap nih July 30 ahkhan an rak tlaih hna, tiah theih a si.

Toru Kubota cu July 1 ah tourist visa in Thailand in Myanmar ram ah a rak lut. July 30 zaanlei ah South Dagon city mart pawng i minung 15 hrawng nih SAC ralkap uk duhlo in lamzawhnak a tuahlio cu vedio a thlak caah kan tlaih, tiah SAC nih an thanh. SAC ralkap kut in tlaih a rak ton ka ah, thlahpiak zau ding in Japan lei nih nawlnak an rak tuah, tiah theih a si. Toru Kubota cu rampi muichiattertu ti in section 505(A) in tazacuai a si, tiah theih a si.