CDM Luh Khawhnak Caan Rikhiah Si Cang! Cozah rianttuantu hna nih ralkap cozah kut tang i rianrruan lo dingin nawrnak Civil Disobediance Movement (CDM)-ah a telmi le tel lomi min list cu March 7, zan 12:00 hlanah kuat cio dingin CRPH-nih minister-i a thimmi Dr. Kyaw Wei Soe-nih cun nizan ah khan social media kal hmang in thawngthanhnak a tuah. March 8 nih thawk cun CDM luh khar a si cang lai tiah a chim.

“Atu hi sawmnak le nawlnak a hnu/donghnak bik a si cang lai tiin a chim fawn. CDM kut ka kan khar cang lai. Mipi lei ah maw na dir lai dictator mi thah hmang sinah dah? biachahnak tuah cang u” tiin Dr. Kyaw Wei Soe- nih cun fiang tein mipi sinah thanhnak a tuah cang.

Cu lawng si loin ralkap doh ruang le lamzawhnak in nunnak a liammi hna philhlonak caah tiin ni 10 chung zun (office) khar a si lai,”tiah thanhnak a tuah i, office, school le University hna cu CDM-ah i tel in ralkap cozah rianttuantu zong nih mipi hna he hmunkhat dirkawp in lamzawhnak tuah dingin a chim fawn. CDM ah aa tel lomi hna cu March 8 ni thawkin zung (office) an kai a herh ti lai lo. Order kan chuah lai i, mipi tthatnak ding caah hrawkhlraltu an si tiin kan phuan cang lai,”tiah a chim. Source: The Irrawady.

Relchih: Nizan ah Saya Tluang nih ca a rak ttialmi ka rel i Khua tampi a ka ruahter. CDM ah itel a duhmi tampi cu nifatin an pawcawmnak ruah ah an itel ngam lo. A cheu cu an rian sungh thai an ttih ruang ah an itel ngam lo. Miphun le ram dawtnak a ngei lomi caahcun a fawi bak lomi a si.

Asinain Ram le miphun a daw taktakmi hna cu, an pawcawmnak an ruat lo. An rian sungh lai zong an ruat lo. An nunnak bak an thap ngam ko. Nihin tiang ah nunnak a chapmi minung 50 hlei an si cang. Ramchung ah a ummi hawi le hna Israel mi hna Egypt ram sal in an luat khawhnak ding caah, Egypt ah an ngeimi thilri le sinak vialte kaltak in ttih a nung takmi rili sen tan an rak ithim bantuk in Kawl Ralkap sal in kan luat khawhnak ding ca ahcun sinak kaltak in CDM ah zumhnak he rethei ithim caan a si.

CDM nih aa timhmi cu zungzal in Ralkap tei kha a si. CDM ah kan ipaih viar ahcun fawite in Ralkap cu kan tei ko lai. Ralkap kan tei ahcun, zungzal freedom kan hmuh lai pinah tulio Kan rian nakin a ttha deuhmi rian tampi ttuan awk kan ngei te lai. “CRPH hi kan zum hna lo. 2008 phunghrampi remh an duh lo. Dr Sasa cu UN kalning aa fiang rua lo” tbk in thiamco icuh caan a si lo.

Israel warrior nih an tei khawh lomi Goliat cu raltuk experience a ngei lomi David nih a tei bantuk in Dr Sasa hi Pathian nih a hman ahcun experience ngei tampi nakin rian a tuan kho deuh te lai. Cucaah thlacam in bawm ko hna usih! Min Aung Hliang nih Aana a ting nak a ruang cu 2008 phunghrampi remh khawh ding a si cang caah cucu a ttih i, hruh-hrulh-hram-hram in aana a lakmi a si. Cucaah CRPH kan ngeih hi Ralkap teinak caah a thabik mechanism a si i, kan tei khawh ahcun 2008 phunghrampi cu a mui hmuh awk hmanh a um te lai lo. Cucaah lunghrinh awk a si lo. By Zasang Cinzah