Chinland Defense Force–Hakha Council Nih Ralrin Peknak Cathanh An Chuah! Chinland Defense Force – Hakha Council nih a uk penmi Hakha peng ram cu SAC nih uknak laak hlan 2021 January thla tiang anmah le khua, ramri cio le an i uk ning in nihin tiang a hmun.

Sihmanhsehlaw, cheukhat nih mah pumpak le mah bu ṭhatnak ah khua le ram daihnak a hrawk kho ding in siseh, dohthlennak a nuarhter ding ah ramri chuhnak, lothlawh, thing hau, meihol rawh ti bantuk thil nan tuah. Hramhram uknak bantuk in thil nan tuah rih ahcun CDF-Hakha Council nih upadi he nan konglam a’n ceihpiak hna lai, tiah ralrin peknak cathanh an chuah.

Thawngpang dang: Karen ramkulh, Kawkareik khuachung kahdohnak ah SAC palik bawi pakhat tel in SAC ralkap 12 an thi i, minung pahnih cu an nung in an tlaih hna. AK meithal pakhat le meithal dang 5 zong kan lak khawh, tiah KNU nih cathanh an chuah. “Minung pahnih cu an nung in kan tlaih hna i, cu chung ah pakhat cu law officer a si, pakhat cu zung rianṭuanmi a si,” tiah an langhter.

Nihin August 15, zinglei suimilam 10:30 hrawng ah Kawkareik khuachung palik sakhan cu KNU nih an luhhnawh hna i, kaphnih kar kahdohnak minutes 15 hrawng a chuak. Cu hnu ah Kawkareik SAC ralkap umnak 97 hmun lei nih khua pawnghrawng cu hriamngan in an kah. SAC ralkap 100 leng nih rallam sial in, khualeng ah hmunhma an lak, tiah tualchung mi nih an chim.