Khuaruahhar lungrethei in um hlah u. Pathian kha zum u, keimah zong kha ka zum ve u. ( Joh 14:1 )Bawipa Jesuh Khrih kan Pathian kongah khuaruahhar le lungrethei in um ding kan si lo. Jesuh zumh hi Pathian zumh a si ko. Pathian zumh tung i Jesuh zumh lo hi tih a nung mi a si. A ngai te ti ah cun Jesuh lo cun Pathian zumhnâk dik a um kho lo. cucu Jesuh Khrih Pathian Fapa tiah Bible nih a timi a langh chan zong hi a si.

Jesuh hi Pathian a si, vun ti ah khin kan hawile cheukhat nih Pathian Fapa a sinâk cohlang lo le, hlawt, Bible merh le Bible kalh ah an kan ruah tawn. Bible i Jesuh sinâk phun tampi hi khrihfa a simi caah cun cohlang ding zat le hlawt bang ding a um hrimhrim lo. kan zumhnâk tahnâk le cuaithlâinâk cu Bible hi a si i, cu Bible chimmi paoh cu zumh le cohlan cu khrihfa sinâk a si. Bible Cathiang nih zumh a kan fialmi lak ah Jesuh Pathian sinâk biathli hngalh le zumh hi phunkhat a si ve.

Jesuh tiah kan timi hi Zeizong vialte ser an rak si hlan ah cun Jesuh tiah auh a rak si rih lo, Jesuh tiah auh a rak si lo ah cun Fapa zong a rak si rih fawn lo, ti kha a fiang. Bible ah cun 1. A hramthok ah Bia a rak si, tiah kan hmuh. ( Joh 1:1, Bia 19:13 )2. Cun Bia cu Pathian a si, tiah a nolh than. (Joh 1:1) Bia a rak si i, Pathian zong a rak simi kha, Amah cu zeizong vialte Sertu a si, tiah a ti.
(Joh 1:10 Kol 1:16 Heb 1:10)

SERTU SINÂK KONG AH CAHLUN LE CATHAR ZOH TINÂK: Cathar tialtu hna lak ah Johan le Paul nih Sertu cu amah Jesuh hi a si ko, ( Joh 1:10 Kol 1:16 Heb 1:10 ) tiah an ti tik ah an palh maw? Nan Phung chungah pei, tehte pahnih an bia aa khen ahcun an chimmi cu ahmaan, tiah aa tial kha. (Joh 8:17)

VAN LE VAWLEI SERTU CU. Keimah cu BAWIPA (JEHOVAH) nanmah an sertu hna le an khamhtu hna ka si. Keimah cu zeizong vialte a sertu BAWIPA ( JEHOVAH ) ka si. Keimah lawnglawng nih van cu ka samh hna; vawlei ka rak ser ah hin ahohmanh nih an ka bawm lo. tiah a ti. ( Isa 44:24 ) Bawmtu ngei lo in amah lawng nih van a rak samh i, vawlei a rak ser cu zeitik ah dah a si ? tiah cun Moses nih hitihin a chim.

Ahramthok ah Pathian nih van le vawlei kha a ser hna tik ah vawlei cu mui zong a ngei lo, pungsan zong a ngei lo. Rilipi cu muihnâk nih a khuh i ti cungah cun Pathian thawnnâk cu â chawk. a ti. (Gen 1:1,2) Phun dang in kan chim sicun Ka Min cu BAWIPA ( JEHOVAH ) a si, tiah minung sin i a chim hlan, Lianngan Bik Pathian ( Elohim ) dirhmun i a um lio ah Van le Vawlei cu a rak ser hna i a sermi rili cungah Thlarau in â chawk mi kha a rak si, tiah chim khawh a si.
Cucu prophet Job nih hitihin a rak tial ve.

Amah lawng in van khi a samh i, Rili tilet cungah a kal. a ti ve.(Job 9:8) Cucaah Johan nih Jesuh cu rili cungah ke in a kal, ( Joh 6:18 -19 ) tiah a chimmi hi , amah lawngin van a rak samh i, vawlei a rak sertu Pathian, Jehovah hrimhrim kha, hi Jesuh hi a si ko tiah a fehternak a si. Cucaah tehte, bia hngalhpitu pahnih Cahlun prophet hna bia le Cathar Lamkaltu hna bia â kheng cang, Johan nih amah (Jesuh) nih vawlei hi a ser, a ti i, cucu Paul nih zeizong vialte hi amah ( Jesuh ) ser mi a si, tiah a ti ve.

Cu lawng hmanh si lo in, Hebrew Cakuat tialtu nih cun BAWIPA nangmah nih vawlei cu ser hram na thok i, van khi nangmah kut nih a sermi an si. tiah Jesuh kha BAWIPA tiah cafang ngan in a auh. Asullam cu Cahlun YHWH ( Jehovah ) kha na si tinâk a si. Rualuk Study Baibal zong nih Jesuh cu thil zeizong vialte sertu, vancungmi nih an biak mi Pathian kha a si. tiah a fehter ve. Cucaah amah lawngin van samhtu Elohim Pathian cu Jehovah kha a si i, cu Jehovah Pathian cu pumsa in â phuan tikah Jesuh hi a si ko. tihi lunghrinh ding le zumh lo awk hrim zeihmanh a um lo. Jesuh hi sertu Pathian hrimhrim kha a si ko.

Gen 1:1 Elohim nih timi le Isa 44:24 JEHOVAH nih timi le Joh 1:10 Amah (Jesuh) nih, timi hi Mi pathum kong chimnâk si lo in. Sining dirhmun in chimnâk tu an rak si. Asullam cu – Bawipa Jesuh Khrih nih YHWH a sinâk le Elohim a sinâk, a lianngannâk, a sunparnâk le a thiltikhawh thawnnâk in van le vawlei hna hi a rak ser hna, tinâk a si.

Cucaah Mi pathum le Mi pakhat ah buai lo in, Jesuh Khrih Pathian hi zum ko hna u sih. Genesis in Biathlâm dongh tiang ah lih a chim bal lomi Pathian cu Alfa le Omega hramthoknâk le donghnâk, a hmasa bik le a hmanung bik ka si titu kan Bawipa Jesuh Khrih kan Pathian hi a si ko. Amen. Hi ca a reltu nan dih lak cungah kan Bawipa Jesuh Khrih kan Pathian hnangam daihnâk cu um ko seh. Credi: Even: John Fready