By Victor Khen Sang! Kalaymyo Kong Ka Ruahnak

Chin News

Kalaymyo Kong Ka Ruahnak! Tutan Kalaymyo khuachung ral thawh dan hi ruah deuh ahau in ka hmuh ko. Kawlram chung khua ngan deuh vialte Kalaymyo dirhmun in rak cawl cio ve hna seh law cu phun dang deuh asi. Anmah Kalaymyo lawng bak in meithal țha te zong i ngeih dih lo, meithal ngeih hmanh ah raldo training akai bak lomi zapi tam deuh nih cozah ralkap pi khua khat ah dir onh peng ding hi caan sau caah cun asi kho deuh lai lo. Ral doh dan “strategy” thleng hna seh law ka duh piak hna.

May be an image of standing and outdoors

1. Mipi chung in hliamhma pu le mithi “casualty” atamtuk nak hnga lo meithal tlai paoh hi contact i tuah hna seh law hmaitonh i tuknak ngol in ngaithleem i tuknak “Ambush” i tuah phun deuh in an cawl ah ațha deuh lai tiah ka ruah. 2. Cun abupi in khuachung ah hmaitonh in dir onh hna loin pikpak in kenkip in rak cawl ah ațha deuh men ko lai, cu lo ahcun ISIS le Taliban pawl nih mipi le hngakchia kha i khamnak “Shield” ah an hman hna i ral an tuk phun khin Kalaymyo mipi kha i khamnak ah hman mi dirhmun ah an um sual lai ti phan aum ngai.

May be an image of one or more people

3. Khuachung i do peng ahcun meithal khu, bom khu in khuami tamtuk kum upa deuh le hngakchia cu zawtfahnak caan saupi tuar khawh asi. Aran deuhnak in raldohning -strategy an thlen ah ațha ko lai tiah ka ruah ko. Tutan Kalaymyo nih ralkap an doh dan cu, Mirang nih Laitlang arak chim i an ngeih mi hriamnam paoh in an rak doh hna bantuk kha asi i Kawl ralkap uknak doh cu ngol hrimhrim lo ding asi. Kan doh ve hna ning in kan tei khawh hna lo zong ah kan tei khawhnak hna lam aum mi paoh in kan doh peng ko hna lai. Bawipa nih Kalaymyo mipi in umpi hna seh law in veng peng hram ko hna seh! Cattaltu: By Victor Khen Sang

Relchih: Fingreicat ah thisen le mitthli he aa bualmi ralram Kalay ah-April 7, 2021 “Zinglei sml. 5:30 hrawngah ngakchia pakhat te a ra, a kan zoh len lio hna ka hmuh. Ngakchia pa te cu Barani lam lei ah a kal hnu minutes pahnih tluk ah ralhrang hna nih meithal in an kan kah colh, kan zaam lai kan ti ah ka hmailei cun an rak khat dih manh” tiah KBZ-2 Bank hmai khan-tat ah a um i a luat manhmi paratha pakhat nih a chim.

Fingreicat caan cu arkhuan caan a si, tuzing cu ar zong khuang ti loin meithal thawng nih khua mipi vialte hmawhmang bu le launak he a kan thangh dih. Thlavai a kiang, inn ummi nih zei tuahawk zong an thei cio hna lo. Fak nawn in meithal thawng a than cu sml.2 tluk a si, chun nitlak chak le thlang in meithal thawng tete theih an si peng rih. Lampi cung le lam teng-nge hna ah ralhrang hna nih hmunhma an la dih. A hohmanh a dimhdorh lo! A hmaiah an hmuhmi minung paoh cu an ral an si dih.

Hriamnaam aa putmi le put lomi zong a dimhdorh lo, lam cung ah bazar kai in motorcycle he a kalmi zong an luat lo, mah tein inn ah a um i vok rawl a pe cuahmahmi putar zong an lut lo i zung lawi caan a phak cang caah zingkaa te in mah le inn lei a tinmi pa zong a luat hlei lo. Minung ruak le thisen cu lam cungah zeimawzat an khat. An kut in an thah ciami minung cung zongah thlachiat an ruat hlei lo. Vawlei ah an rawt i an motor cungah saram phurh in an phurh. Lam cungah ruak a um ti theih zongah hohmanh chuah ngam a si lo.

Anmah nih an i kalpi hna i an ralhrang siizung ah an chiah hna. An chiahmi ruak hna zong cu tuzan ah lak ngah a si rih lo, thaizing ah lak khawh a si te lai tiah thawng an thanh. Ruak a latu ding chungkhar ca zong ah thin a phang — cheukhat khua ah ruak latu hna an rak tlaih beh hna! Zinglei sml.10 tiang khan cun minung 7 an nunnak a liam cang ti a si, a thimi an karh than i atu tiang ah cun minung 11 nunnak a liam tiah kan theih than.

Hliamhma a tuarmi minung 20 leng an si. Anmah ralhrang lei cun hohmanh nunnak liam dawh a si lo, liam hmanh hna sehlaw ho nih fiang in theih khawh a si lo. Hi lakah a nung in an tlaihmi minung tampi an um rih! An mit an huh hna i lam cungah saram hrem in an hrem rih hna. An duhning paohmah le paohmah zeimawzat in dat an tat than te lai. Minung 30 leng cu tuzan ah an nu le pa, an fanu fapa le an nupi le nih zanriahei caan an hngah, nain tin zai an rel ti lo.

Minung 11 cu an ruak he an inn an kir lai i, a dang paoh cu tu hnu caan zeimawzawt hnu lawngah an ruak he maw an mipum in dah innlei an phanh te hnga! Tukum dothlennak Kalay peng ralram ah ralhrang kut in nunnak a liam cangmi minung 30 fai kan si cang. A caan a rau i Mino kan thazaang zong kan zor ngai cang. Rawlei zong chung pil kho loin kan thazaang zong a ba ngai cang. Thazaang (hriam le set beuiha) lei cun kan tei kho bak hna lo, nain kan thinlung cu tuni tiang a kan tei ve hrimhrim rih lo. Maw fingreicat ah thisen le mitthli tlaknak in a khatmi Kalay ralram te aw, “Ni ceu dawh te van chuak cang ko mu tiah Kalay khuami nih mitthlai he kan in nawl, hi hnu ah nunnak a liam chap than dingmi kan ruat kho hrim ti lo.” Credit: Za Bawi Thawng

Leave a Reply