Trump a ttanhtu pawl nan Pu cu zoh ko uh hi. Andrew Johnson hnuah amah hi the Inauguration ah a tel lomi/a kai lomi pakhatnak a si lai ti si ko hi. Pathian nan thimtermi le nan hmantermi pa cu nikhat hnu nikhat in zohchia thil a tuah lengmang ko hi. Pathian a lawm lai lo a lungfak lai.

US mipi US democracy, US phung le lam, a party hawi le Democratic Pary pawl zei i a rel hna lo le a upat hna lo zong a si fawn. Zeitluk zohchia dah a si. Thla nan campiak deuhdeuh thil ttha lo le zohchia thil tam deuhdeuh in a tuah ve. Capitol innpi i a lutmi pawl zong US cozah sihni pawl nih bia an ceih hna lai, palik nih tlaih ding in an kawl cang hna lai ti si. Thong ah an thlak dih hna lai.

Facebook le Media i, Trump ttanhtu Laipawl cheukhat duh poah in a dik a hman loning in le holh chiakha hmang in ca a ttialmi le comment a pemi pawl khi Capitol innpi i a lutmi bantuk nan si ve. Arthluak bantuk a neimi deuh nan si. Musalim ralhrang nan lo. Pastor le Khrihfa bu a nei lomi ko nan lo. Fapa tlau bantuk nan si.

Relchih: Keimah duhning le ruahnak ka van chim ve ahcun US ram tuanbia ah a um bel lomi, US democracy uknak le US mipi zei rel lonak, US tuanbia ah a muichia bik a ttialtu le a tuahtu, Trump dantatnak ah tiah a taangmi ni 12 chunghi president ttuanter ti loin Mike Pence nih Trump i din lonak tuah a fialmi a pom lo ruangah Pence tuk president sinak pek i ni 12 chunghi ttuanter hna seh law a ttha hnga ka ti, na felman laksawng ah tiah. Mahcun US mipi thinlung a damter deuh lai i Trump ttanhtu pawl an lung a fim deuh lai.

Cuve bantuk in Trump cu vote pek ding in mi a forhtu, Laimi pastor cheukhat le vawlei lei hruaitu cheukhat pawl le Media ah duhpoah in lih le hrokhrawl in Trump ttanhtu pawl ruahchannak a pe pengtu hna, mipi zaran thluak a hrawktu le Trump ttanhtu cheukhat pawl nih mi cattialmi tangah khawmenh (comment) dawh lo ngai le holh chiakha pek a hmangtu pawl nih Laimi (Chinmi) nan unau cheukhat sinah ngaihthiam halnak tuah uh law a ttha tuk lai ka ti. Culawng siloin, a bik in Pathian sinah ngaihthiam nan hal i nithum chung rawl-ulh in thla nan cam a hau lai ka ti. Aruang cu nanmah pawl hi Laimi (Chinmi) tuanbia dawh loin a ttialtu nan si ve ti khawh nan si i Chinram le Chin miphun a hrawktu le a khangtu nan si ve. Chin miphun le Chinram caah thluachuah a phur lotu/a khamtu nan si fawn.

Chin miphun le Chinram mui a chiattertu le belmang a nalhtu nan si. Culawng hlah, nan i thawh riangmang i nanmah duh tein, Trump cu Pathian thimmi hmanmi le umpi mi le thluachuah mi a si nan ti rih. Mahkong ah Pathian a lung a rawk tuk lai. A lawm lai lo. Pathian nih nan sinah biahal awk tampi a nei lai ka zumh. Ziah ka biathiang, Bible chungah Trump bantuk minung ka hmannak hna a um maw a ti lai. Ziah Khrihfa tuanbia zongah Trump bantuk cu sualnak dohding ah le ka ram kauhnak ding caah ka hmang bel ttung hna lo, mah zong cu nan tuak lo maw an ti hna lai. Cucaah, Trump ttanh le vote pek cu pialsual/kalsual phunkhat a si ko. Cattialtu: Van Tum

Trump vote pek ding in mi a forhtu hna. Lai pastor cheukhat le vawlei lei hruaitu cheukhat zong sualnak nganpi pakhat nan tuah ve ti khawh a si. Kan Lai miphun le kan Lairam caah thluachuah a khamtu le a dawntu nan si ve ti khawh a si. Mah ruangah Pathian sinah ngaihthiam nan hal a hau lai. Raldoh a duh tukmi le mi puarhrang, Republican party ttanh cu mithah duh ve bantuk he a lo. Khrihfa mi cu Bawi Zisuh bantuk in nunnem nun le toidor nun a nei ding tuk kan si deuh. Trump bantuk lungput le ziaza a neimi, Pathian nih a hmang bel hna lo. Ka fim ngai tiphun in le ka theihdih tiphun in hehtiah Trump ttanh ding le vote pek ding in video le cattial in mi a forhtu hna bantuk pawl khi Bible nih cun “MIHRUT” a ti hna.

Trump ttanhtu Laimi cheukhat cu Trump nan ttanhnak ah Sodom le Gomorah khuami hna tluk tein nan sual ve cang ti khawh nan si. Cucaah, Pathian nih Lai miphun le Lairam cungah dantatnak a tlunter nak hnga lo le a thluachuah a kham lo nak ding caah rawl ulh thlacamnak cu nanmah le nan umnak khua cioah rak tuah tengteng uh tiah kan cah hna/kan forh hna. Biden le Harris le Democratic Party cu hi hnu a tlawmbik kum 8 in US ram caah le vawlei cung ramkip le miphun kip caah Pathian nih hmangchin ko hna seh!