Chin Mino Hna Sin Biacah! Chin mino hna ralkap cozah dohnak caan tha nan ngeih hi nan iuar dingah ka ruah. Nan ngeihmi caan tha kha raltha tein hmai nawr khawh i zuam chih uh. Dothlennak nih pasaltha le nusaltha a hrin tawn hna. kan miphun chung in bochan thlak pasaltha le nusaltha nan chuak lai. Kan zoh thla tuk hna.

Chin mino hna le sianghleirun siangakchia hna nih mah dothlennak hi hmaisuang in nawl hram uh. A dihdongh tiang ngol loin pehzulh khawh izuam uh, nanmah chan i cozah nan thlen khawh ahcun hmailei fanau hna le techinfapar, [ next generation ] hna nih a theipar an zuun lai.

Nan ule chan ah kan si khawh tawk kan i zuam, thisen tampi, nunnak tampi, hremnak le temtuarnak phunphun tampi kan tuar nain kan hlawh a tling kho lo, nanmah chan ah kan hlawhtling hram seh. Kanmah chan i kan hlawh tlin lo ruangah nanmah chan ah nan tuar, nanmah chan i nan hlawhtlin lo ahcun nan naule, nan fale chan nih an tuar te lai. Ram ca le miphun caah tuanbia dawh tial khawh izuam hram uh. Kan thinlung dihlak in kan in dirpi hna. Chin mino hna upatnak le bochannak tampi he,
Salai Lairamthang 88 Generation

Relchih: Kawlram Khrihfa bu komh le Bible sianginn kip cio nih statement an chuahmi hna pawl zohtik ah minthut lo an tam. Minthut buin chuahmi cu an tlawmte. A herh tuk cu a si lem lai lo nan. Aruang cu a um ko lai ka zumh. President siloah GS siloah principal ti bantuk nih minthut awk a si nan ka ti. An ngamh lo bia hna a si hnga maw ka ti.

Kum 2007 lio ah Kawl Buddhist Phungki pawl hruainak in sandah rak piah a si. A rak buai tuk ve. Khrihfa lawnglawng kan rak i tel lo. M.I.T ka kai lio si kaw, Dr. Zau Lat nih a kan timi cu atu lio buainak ah hin Khrihfa pawl nih zeidah kan tuah ve awk a si timi a kan chimter. Kan ruahnak chim cio ding a kan ti. Keinih ka timi cu MCC tal nih ca an tial i uktu cozah sinah an kuat awk si ka rak ti bel. A ka timi cu mah cu kan ruatmi kan ceihmi a si ko nan minthu ngam an um lo i kan ttial tthan lo a ti.

Ka palh lo ahcun mahti cun a chim ko rua tiah ka ruah. Atutan statement pawl tamdeuh zong minthut lo a tam ngai. A herh lo an ti bia maw si hnga siloah an thut ngam lo biadah a si deuh hnga ti hna ka ruat. Tlaihkhih taktak hna khi van chuak seh law minthu tu lawng tlaihding cu a relrem lai lo an tibia hna si hnga maw ka ti pah fawn. Letterhead paper in ttialmi cu minthut a tel awk bak si nan. Kan bu chuahmi zongah minthut a tel ve lo. By Saya Van Tum