By Salai Lairamthang: Hawile hna a tanglei ka thil chihmi article ka timi hi mi tampi nih an rel khawhnak dingah share rak tuah cio te uh. Nizan ka thlahmi article minung 145 nih nan share caah ka lawm hringhren. (A Chim Bantuk In A Tuahmi President Donald Trump) US President a cuhmi paoh nih election lai ahcun cucu ka tuah lai, khakha ka tua lai tiah election campaign lio ah mipi lunglaaknak le lemsoinak ah an chim cio. Asinain a chimning bantuk in a tuah taktak mi nak in a tuah lomi an tam deuh lai tiah ka zumh.

President cheukhat cu Election campaign an tuah lio ah mirum tampi sin in phaisa bawmhnak an laak, Media pawl duhning zawng in bia an chim, teinak an hmuh taktak tik ah phaisa a bawmtu hna, media lei in a bawmtu hna duhning loin rian an tuan ngam ti lo. Cucaah thil dik an tttanh ngam lo, media duhning le a bawmtu hna duhning lawng in rian an tuan. Media nih a dik loning in thil an chim zongah an I theihter ti lo. Media duh zong in bia an chim. Asinain President Trump cu adik lomi ah ahohmanh a care hna lo. Media zong nih thil dik lo an phun ahcun a dik lonak a soisel ngam hna.

President Donald Trump cu mirum a si caah aho bawmhnak phaisa laak hau loin election campaign tuahnak phaisa a ngeimi a si. President thla hlawh zong a laak lo caah tihding le aho mithmai zoh ding a ngei lo. A dik a timi cungah fek tein a dir. Aho mihmai hmanh zoh a tim lo. US ram pumpi thatnak lawng a tuakmi a si. Media mithmai le phaisa in a bawmtu mithmai zong a zoh lo. US rampi huap caah a tha a timi cu soisel a ton zongah a pah chih. Mirang, Minak Asia tiah aho mithmai a zoh lo. US ram pumpi caah atha a timi cu raltha tein a tuah. US ram caah a thatnak a si ahcun ramdang mithmai zong zoh a tim lo. Ramdang president ka si lo, US mipi nih thimmi president ka si caah US mipi le US ram ca thatnak caah ka tuan lai ” tiah a chim tawn. A chim bantuk tein vawleicung khoika ram hmanh a tih hna lo. US ram thatnak caah cun ramdang mithmai zoh a tim bal lo.

President Trump nih president a chuah hlan election campaign lio tein ka tuah lai tiah a chimmi chung in a tuah cangmi cu a tanglei ah ka thil chihmi pawl an si. President Donald Trump Nih A Tuahchuah Cangmi: 1) Jerusalem cu Israel Capital ah ka cohlan lai a ti bantuk in a cohlan pin ah, US embassy cu Jerusalem ah a thial. 2) US tax petu hna phaisa hmang in nau thlak, nau thah, nau hrawh a pommi hna, International abortion tuahtu NGO le INGO pawl bawmnak a phih piak hna. US I Abortion a tuahtu Planned Parenthood pawl zong federal funding a phih hna.
3) Obama nih a rak sermi transgender school law a thlen, public Sianginn I thlacam a ngah lomi phung zong a hrawh.

4) Obama nih Iran duhning in an rak tuahmi, Iran Nuclear-Deal, hrawh taktak. Sanction zongh a tua chihh. Iran cu muslim ralhrang terrorist a bawm tu bik a si. Iran ah sipuazi a thli tein a tuahtu, Tuluk company Huawei company ngeitu i fanu, Meng Wanzhou cu Canada ah a tlaih ter hna I taza a cuai ter hna.

5) America ram ah Oil/Gas a chuah I, middle east pawl a bochan tawnmi kha a dongh ter. America ramsung ah oil/gas tampi a chuah tik ah middle east pawl duh tawk in sanction a tuah khawh hna. 6) 1969 ah America ram ah rian ngei lomi, a tlawn bik le riantuantu an tambik caan sipuazi a tha bikmi caan a ser khawh. 7) Christmas ah White House in “Merry Christmas” tiah vawlei pi theih in a phuan ngam. Obama chan ahcu Merry Christmas tiah a chim duh lo, Happy Holiday” a ti.

8) Obamacare ruangah, health insurance ngei lomi cozah nih dantat mi phung a thah. 9) UNO ah Israel fek tein a dirkamh. Obama chan ahcun Israel cu dirkamhtu cu chim lo, mawhchiat an tong zungzal. 10) Religious freedom act thar a tuah, biaknak zalonnak phung thar a ser, na zumhnak ruangah tazacuai khawh a si ti lo.

11) North Korea nih nuclear test a tuah tawnmi cu a zor ter. 12) Khrihfa a thattu, an hngawng a phet tu hna, ISIS muslim ralhrang a thio dih hna. A thong in a thah hna. An hruaitu Abu Bakr al-Baghdadi zong a thah. 13) Hlan lio North Korea ral ah American ralkap thimi pawl ruak USA phurh dih hna. 14) Supreme court ah conservative, Pathian zummi judge pathum a thut ter hna cang.

15) DACA law (human trafficking ah an hman) a thlen, ramdang mi a hlei in Latin leimi US ah a thli in a luttu pawl a zor deuh. 16) US Cozah in mipi an temtawntu phung tampi a hrawh. 17. China he trade deal a tuah khawh. US nih China he chawhlehnak ah kum khat I, US $400 billion reng lo sung tawn. Asinain a ra laimi kum 2 chungah China nih US sin in US$ 220 billion man a cawk cang lai. 18. President Trump hruainak in US, Mexico le Canada nih USMC trade deal a tuah khawh I, NAFTA a hrawh. US nih kum khat ah US$ 26 billion a hmuh chap hlei ah US GDP US$ 68.2 billion a kaiter lai.

19. US Mexico border wall meng 200 tluk a lim cang. Meng 90 a thar chuah. Atu cu US Mexico ramri cu Mexico ralkap thong 20 nih felfai tein an chongh caah phungning loin US a lutmi an zor tuk cang. Mah ruangah rit si, mi tha lo, Gang le minung zual a zor. Nu tampi cu gang nih US ram chungah an luhpi hna I, an zuar hna. Mexico president thar he hnantlaknak laak in US le mexico ramri cu Mexico ralkap a conghter hna. Phungning lo lutmi, minung, gang le drug a zor.

20. President Trump nih Israel le UAE karlak le Israel Bahrain ram karlak ah daihnak a serpi khawh hna. *biakilh: Talkshow tuahnak ah ka chimmi chung in ka laak thanmi a si