Zahnak Area Chung Ah Ramvaihnak Scope Hmang In Ramvaih/Vakah Le Lenkhang In Va Rapchiah Kham A Si Cang! CDF-Thantlang Lei control Area pakhat asi mi Zahnak Area chung ah Zahnak Youth Association le Khuabawi hna hnatlaknak in Area chung ah scope bunh mi zen/kuan meithal phun he ramvaih le vakah siseh lenkhang zar in varap chiah (lochung riit khamnak telh lo) khap  asi cang tiah theih asi.

Cu hlan cu ZYA le Bawitlang nih an khap nain hmalaknak ai ruan lo ruang ah Police sin ah ap a si cang caah Police nih hma an lak cang lai. Scope bunh chawm mi meithal/air-gun cu hmuhnak poh ah chuh an si lai i lenkhang varap tarh cu hrawhpiak an si lai tiah Department of Information Director- PATZA (PATZA- Public Administration Thantlang-Zahnak Area) nih The Chin Post ah a chim. Hi bantuk kan tuahnak a ruang hi atu lio Lai khuate lei ah lenkhang zam in va rapchiah ruang ah siseh airgun scope bunh in vakah hman tuk ruangah sa-va an an har ngaingai cang i, mipi lei duhsaknak ruang ah a si tiah a chimchap.

Thawngdang UN Palai Nay Pyi Taw Tlawn A Thawh  UN Palai Nay Pyi Taw Tlawn A Thawh 2022 August 16 – UN Secretary General nih Ram komh Kawlram caah palai athimmi (UN Special Envoy for Myanmar) Mrs. Noeleen Heyzer cu Nay Pyi Taw tlawn athawh cang tiah August 15 ah UN zungpi nih thanhnak an tuah. August 16 ahhin Ramkomh Kawlram aphan lai tiah theih asi.

UN Palai nih tlawnnak nih hmaithlak ding mi cu ral ruang ah harsa mi bawmh (humanitarian assistance) le kahdohnak dohdalnak dih dongh ter ding kong a si tiah Singapore hrambunh CNA thawngzamhnak nih a thanh. Nihin a cang cuahmahmi le arawkral cuahmahmi kong he peh tlai in siseh cun UN palai nih a tuahkhawhmi ri chung in tuanrelnak a ngeih lai tiah UN chimrelnak nawlngei Stephane Dujarric nih a chim. Atu bantukin UN palai nih tlawnnak timhtuah cuahmah asi lio ah Aung San Suu Kyi cu Ralkap nih biacaihnak in kum 6 thongthlak ding in biakhiahnak an tuah chap mi kong he Malaysia ramleng pehtlainak lutlai nih soiselnak bia a chim.

Chanel News Asia ah Min Aung Hliang hruaimi Ralkap phu le zalonnak Federal Democracy caah raltu cuahmahmi karlak ah nawlngaihnak cheuh (power sharing) in thawk awk asi timi bia arak chim ruang ah soisel fak ngaingai in a rak tong bal cang. UN nih Special Envoy rian khinh asi hnu in kum khat le cheu a rauh hnu lawng ah Noelee Heyzer hi Nay Pyi Taw tlawn athawh hi a si.