Breaking News: Wuhan- Covid-19 Kong Thawngthanh Tu “Zhang” Cu China Cozah Nih Hremnak An Pek

World News

Chinese journalist le lawyer hlun simi Zhang Zhan kum 37 cu Wuhan-i Covid-19 zawtnak a chuak mi kong vawleipi theih in thawngthanhnak (report) a tuah ruangah China cozah nih tlaih in kumnga chung thongthlak dingin hremnak pek a si.

Image may contain: 1 person, glasses, selfie and close-up

Zhang Zhan nih hin Wuhan zawtnak konglam thawng a thanh ruangah kan hnu May thla ah khan tlaih a si. Zhang tlaih a si hlan, February thla ah khan Covid-19 zawtnak aa thawknak, Wuhan kong cu vawleipi theih in thawng an thanh ruangah journalist pathum hna cu an konglam theih khawh loin an tlau colh. Asinain April thla ah khan an lak i pakhat, Li Zehua nih cun leng chuak kho loin kharkhumh a sinak kong cu a chim i, a hnu ah Chen Qiushi zong cozah ngiatthlainak tangah a umnak kong cu theih si tthan. Anmah pathum lak i pakhat, Fang Bin tu cu nihinni tiangah a konglam theih khawh si ti lo.

February thla ah khan Zhang hi Covid-19 zawtnak hmuh hmasa nak le a thawknak, Wuhan khua ah kal in, thawngthanhnak phunphun a tuah. NGO, Network of Chinese Human Rights Defenders (CHRD) nih a langhter ning ahcun Zhang nih hin China cozah nih journalist-an kharkhumh ning, zawtnak ruangah a thi chungkhar pawl hrenhkhumh an sinak kong cu a phozar tiin an chim.

May 14 ah khan Zhang hi Wuhan in a thawngpang theih khawh ti lo in a um i, a hnu ah Wuhan-in km 640-aa hlatmi, Shanghai-ah police-nih an hrenkhumh ti theih a si tthan. June 19 ah khan Shanghai-ah tlaih a si i, tlaih a si hnu thlathum hnu September 9 ah khan a lawyer ton dingin cohlan a si.

A luancia cacawn ningani ah khan Zhang hi phungning tein case tuahpiak a si; text, video le media kip ah WeChat, Twitter le YouTube kal hmangin biadik lo a phuanzar. Hi pinah ramdang media-nih interview-an sawmnak cu a cohlan ruangah sualphawt a si. Cun, Wuhan-i Covid-19 zawtnak a lengmi kongah biadik lo a a thanh tiin China nih sual an phawt hi a si. Hi sualphawtnak ruangah Zhang hi kumnga thongthlak dingin cozah nih bia an chahpiak hi si.

Leave a Reply