Wallay palik sakhaan KNDO phufonh nih an lak Karen ram, Myawady peng, Wallaymyaing peng cheu ah a ummi SAC kuttang Palik sakhaan cu Karen National Defense Organization KNDO phufonh hna nih June 13 zinglei ah an kah hna i sakhaan bawi telh in palik 4 a nung in tlaih an si PDF kan khamh khawh hna tiah KNDO phu captain Salung kuttang hriamtlai 1 sin in theih asi.

Tuzing ah palik sakhaan kan lak khawh. Mei in kan khangh. Palik 4 kan tlaih khawh hna. PDF 9 kan khamh khawh hna. VENOM pawl a ṭha bik in an i zuam. An mah tein an kherhhlai man a phu tiah Captain Salung kuttang hriamtlai 1 nih a facebook cahmai ah atar. Palik sakhaan kahdohnak chungah 60MM 1 le hriamhme 3 le zen cheukhat chuh khawh an si tiah theih a si. Wallay sakhaan hi Captain Salung hruaimi KNDO commando battalion le PDF hna fonh in an kahmi hna a si i kahdohnak kong le hriam chuhmi kong he pehtlai in phungning tein thanhmi a um rih lo.

https://www.facebook.com/THECHINLANDPOST/videos/439848387515438

 

Thawngdang Hriamnam He Kan Sin Ah aa Rak Fonhmi PDF Pawl Cohlan An Si Lai Tiah SAC Nih Athanh. Hriamnam he kan sin ah aa rak fonhmi PDF pawl cohlan an si lai tiah SAC nih a thanh.  People Defense Force (PDF) phu pawl nih rampi hmailei rianṭuannak ah rianṭuanṭi ding in rii khiahmi phung chungah hriamnam nan ap i mipi sawhsawh dirhmun dir nan duh ṭhan a si ah cun cohlan nan si lai tiah SAC nih June 11 ah a thanh.

Ramkhel ruang le tlangcung miphun dang cio sinak ruangah theihthiamnak a pial sual i ramchung hriamtlaih buainak a chuak hnu ah rampi ṭhanchonak a donh caah CRPH le NUG nih sawmmi PDF telh in hriamtlai phu tampi dirh in doh kan si. Cuti thil a kal peng a si ahcun rampi daihnak le democracy ṭhanchonak a nuarhter chin lai tiah SAC nih a thanh.

SAC nih lakhruak in sermi phung ser dih a si hnu ahcun 2008 phunghram he a tlakning tein tlukruannak a ummi Party tling thimnak atuah asi lai i teinak a hmumi Party cu rampi rian khinh le uknak nawl pek an si lai tiah a langhter. Sagaing ramṭhen, Kalay ah zeihmanh sual nak tuah loin ralkap sin ah a rak fonhmi PDF training a dih cang mi PDF chungtel pa 3 le nu 2 cu June 6 ah an nu le an pa sin ah hlung hlai tak in kuat an si cang tiah a thanh. CRPH, NUG le PDF phu hna cu SAC nih biaruahnak kan ngei bal lai lo tiah voi tampi an chim ko nain atu ahcun PDF pawl cohlan an si tiah sawmnak a tuah cang.